Serchhip District-a Lungkawlh khua ah ‘Mithun Multiplication Centre’ hawn a ni
Nimin-a Mithun Multiplication Centre, Lungkawlh hawnna hunah hian AH&Vety Minister C. Lalsawivunga chuan ram hmasawn ni tur chuan intodelh a pawimawh hmasak thu tarlangin, ei leh bar, a bik takin sa a kan intodelh theihna tur hmanraw pawimawh tak mai hawn theih a buatsaih a ni chu lawmawm a tih thu a sawi a. Mithun Multiplication Centre-in ei leh bar-a intodelhna a thlen theih nan Department-a mithiam thawktute leh Sial Culhtu Society-ten neitu nihna thinlung pu chunga thahnemngai taka bul an tan a pawimawh thu a sawi bawk. Vety Minister chuan Mithun Multiplication Centre, Lungkawlh chu ran chi tha leh hrisel thar leh semchhuahna hmun pawimawh a nih theih nan duhsakna hlanin hri lak a ran an him theih nan FOCUS 2.0 atangin Bio Security Fencing te pawh beisei a nih thu a sawi bawk.
Mithun Multiplication Centre hawnna hun hi AH&Vety Department-a Addl. Director (VS&PH) Dr. F. Lalramhluna chuan kaihruaiin Khual zahawm Bialtu MLA leh Adviser to Chief Minister Lalmuanpuia Punte pawhin Project tha tak siam a ni chu lawmawm a tih thu a leh hlawhtlinna tluantling thlen turin thawktute leh Sial vulh lam tui mite inpekna a pawimawh thu a sawi bawk a ni.
He huna Report petu Dr. Robert Rualthankhuma, Deputy Director (P&M) in a tarlan danin Mithun Multiplication Centre hi Lungkawlh Sial Vulh Co-operative Society ten kum 2022 khan Sesih leh Luangphul ram, Lungkawlh-a din turin North Eastern Council (NEC) hnuaiah Project dilna an thehluh angin cheng nuai 531.83 senga siam a ni a, Contractor-te hi AIE Construction, Tuikhuahtlang, Aizawl a ni. He Centre-ah hian Sial In te, Watch Tower, Isolation Ward, Bio Security Fencing, Solar Lighting System, Surgical Instruments, Vaccine, damdawi leh tul dangte dah a ni.
Lungkawlh Sialvulh Farming Society-ah hian Member 62 an awm mek a, nimin-a he hun hman ah hian Sial vultute hnena Sial hlanna hun hman nghal niin AH & Vety Department chuan Sial 180 vel a lalut tawh a, Lungkawlh Sial Vulh Society ten Sial 100 vel vulh sa neiin tun dinhmunah Sial 300 chuang a awm mek a ni
Comments
Post a Comment