Mizoram-a CSS hnuaia thawktu hrang hrang ten naktuk atangin lungawilohna lantir an tum

All Mizoram CSS Employee Coordination Committee (AMCECC) chuan Sawrkar laka an thu thlen te tih hlawhtlin anih loh avanga leh an dinhmun tih danglam tumna a awmloh avangin naktuk, April 15, 2025 atang hian ni thum (3) chhung Sawrkar laka lungawilohna lantir nan  Pen/Tool Down Strike neih an tum thu an sawi.

Hemi chungchang ah hian AMCECC General Secretary Vanlalpeka chuan Mizoram sawrkar hnuaia CSS Employee ten hun rei tak chhung sawrkarah an dinhmun siamthat anih theih nan dilna an lo thlen tawh thin tih sawiin, nikum-a CSS Regularisation Scheme passed tak chu a taka hman ngei an duh tih a sawi a. A hlawhtlinna nghakhlel taka an thlir mek laiin, DP&AR(ARW) atanga Office Memorandum (21.10.2024) chhuaka checklist chuan harsatna nasa tak siam sakin Department thenkhat proposal te hnawl a ni ta zel tih a sawi a. Chuvangin an harsatnate hi Sorkar in a rang thei ang bera ngaihtuah sakin Department hrang hrang hnuaia CSS thawkte dinhmun leh harsatna tawh mekte chinfel sak tura an phut thu a sawi a ni. Hei bakah hian Mizoram puma CSS-a thawk mi 17,000 te chu sawrkar kut ke ber an nih avangin a ngheta dah awm tak vek an ni tih pawh sawiin, tun dinhmunah MR an bill theihloh bakah Pay Scale mumal neilo in pension pawh awmlo in an thawk thin tih a sawi bawk.

AMCECC chuan Provisional Employees/State Contract-te tan an mamawh anga Departmental Promotion Committee (DPC) awlsam taka Sawrkarin a siamsak thin anga CSS Employees-te tan DPC siam ngai ah leh Corresponding Post siamrem leh a tul dan a zira Equivalent/Temporary Post siam ngai ah siam sak an phut thu te; CSS hnuaia thawkte chu kawng hrang hrangah enhran leh hlamchhiah an ni fo thin chu na an tih thu leh Mizoram hmasawnna atan thahnemngai taka an thawh angin hamthatna leh an Service-ah duhsak ve tura an phut thu bakah Mizoram Sawrkar hnuaia a nghet a thawk ten a hun taka hlawh an lak thin laiin CSS hnuaia thawkte’n hlawh an la mumal lo fo thin nia sawiin, “CSS kan kalpui danah tun aia chak lehzualin Central atanga Fund nawrchhuah a nih theih nan hma min laksak turin kan phut a ni,” an ti.

AMCECC chuan tunkar Ningani thlenga  Pen/Tool Down Strike an neih ah hian Damdawi In lama Emergency Duty te an hrethiam dawn tih sawiin, an lungawi lohna lantir hian awmzia a nei lo a nih chuan an kal zel dan tur an ngaihtuah leh tur thu an sawi bawk.