Serchhip-ah Fire Safety Awareness leh Mock Drill nei

Rampum-a ‘Fire Service Week’ hman mek pualin Ningani khan Serchhip Kawlri-a Eklavya Model Residential School-ah Fire Safety Awareness leh Mock Drill neih a ni.
April 14 atanga April 20 chhung hian ramchhungah ‘Fire Service Week’ hman mek niin he Hapta denchhen hian Fire Station Area tina School pakhat tal ah Fire Safety leh Mock Drill hi neih tura ruahman a ni a, hemi denchhen hian Serchhip Fire Station-a thawktute chuan Ningani khan EMRS-ah hian Fire Safety Awareness leh Mock Drill hi an buatsaih a, he hunah hian kangmei a lo chhuah thulha chet lak dan hrang hrangte chu zirlaite hnenah zirtir an nih bakah a taka tih dan te entir a ni bawk. Hemi hmalam hian New Serchhip a Mercy Hospital pawh tlawhin kangmei chhuah thulha invenna an kalpui dan tur ruahmanna an neih te enfiah a ni bawk.

Fire Station-a thawktute hian kangmei chhuah thulha chet lak tur an zirtir bakah hian chi-ai mai lova Fire Station Phone no. 03838 222135/8119884154 emaw, Police Station-ah hriattir vat thin turin an chah a. Hliam tuarte bawih-sawm dan tur leh chhanchhuah hna thawh dan tur bakah Kangthelhna hmanraw chi hrang hrang hman dan tur te a takin an entir bawk a ni.