Buhfai quintal 7566 zet hum thei niin sawi

ZPM Party chuan March 2025 khan buhfai quintal 7566.61 lai chu Sawrkarin a hum thei nia sawiin, hei hi a pawisa-a a hlutna chu cheng vbc. 2.2 chuang zet a ni tih an sawi.

Nimin-a thuchhuah an siamah ZPM Party chuan Supply Minister leh Sawrkar Official te hmalaknaa buhfai bo thlau tur venna kal zelah Godown lama thawkte leh Retailer ten buhfai buk dik taka an pekchhuah tak avangin March 2025 khan buhfai quintal 7566.61 lai chu Sawrkarin a hum thei ta nia sawiin, a pawisa chuan a hlutna hi cheng vbc. 2.2 chuang zet a ni tih an sawi a. “Thlakhat ah buhfai mipui khul tur hi quintal 97,439.63 mamawh thin a ni a, March 2025 thla a buhfai saving quintal 7566.61 a awm theih avang hian April 2025 quata ngaihtuah belh ngai chu quintal 89,873.02-ah a tlahniam thei ta hi ZPM Party chuan ram siamthatna kawnga hmasawnna ropui takah kan ngaia, a changtu Minister Pu B.Lalchhanzova leh Sawrkar officials te thawhrimna kan chhuang hle a ni,” an ti.

ZPM thuchhuah chuan thlatin buhfai quintal 7576 kalral tur sawrkarin a hum zel theih chuan kum khatah quintal 90000 chuang a tling thei dawn nia sawiin, a sum anga chhut chuan cheng vbc. 30 vel zet niin an sawi a, “Hei hian a man to a buhfai kan lei thin kha a ti tlahniam dawn a, State pawna buhfai leina atana sawrkar sum hman pawh a tlakhniam phah dawn bakah NFSA hnuaia Card Eng leh Card Pawl-ah mi nuai khat zet thun theih an ni dawn a ni. Hetiang taka Sawrkarin mipui tana ngaihtuahna a sen avang hian Godown lama thawktute leh retailerte pawhin buk dik taka buhfai pe chhuak chhunzawm zel turin kan ngen a ni,” an ti bawk.