Sawrkar in Sawhthing neitute manganna a hria a, a sutkianna atan kan lei sak leh tan dawn - Agri. Minister

Zonuna Kawlni (LENKAWL) • April 19, 2025 • Comments • Mizoram

Agriculture Minister PC. Vanlalruata chuan Mizoram sawrkarin a thawhnihna atan Mizorama kuthnathawktu te Sawhthing tharchhuah a lei leh tan tawh dawn thu sawiin, “Sawrkar chuan Sawhthing neitute manganna a hria a, a sutkianna atan kan lei sak leh tan dawn,” a ti.

Ningani (April 17, 2025) khan thuthar thehdarhtu thenkhat ten a Pisa-ah kawmin Agriculture Minister PC. Vanlalruata chuan Sawhthing an lei tan leh tawh dawn thu hi a sawi a, “February 20, 2025 atanga March 20, 2025 thleng khan sawrkar chuan Mizoram hmun hrang hrangah Sawhthing kg.ah cheng 50-in Secondary Collection Centre (SCC)-ah a lei khawm a, chungte chu Sairang-a FCI Kudam-ah dahkhawm thin a ni,” a ti a, FCI Kudam atang hian Sawhthing hi hralhchhuah ve reng a nih thu sawiin, “Lilam hmangin Sawhthingte hi hralhchhuah thin a ni a, a chhangtu an rawn awm ve reng a ni. Tun dinhmunah quintal 6,200 vel hralh a ni tawh a, hralh loh quintal 1,800 vel a la awm,” tiin SCC atang pawhin lilam hmangin Sawhthing hi hralhchhuah ve reng a nih thu a sawi bawk.

Agriculture Minister chuan karleh Thawhtanni, April 21 atang hian a hma ang thoin Sawhthing kg. ah Rs. 50 in an lei leh dawn tih sawiin, “Lo cho lawk, dah rei tawh si te an hlauthawng. Chung mite dinhmun chu kan hriatthiampui a, Phase-I ang thoin engemaw zat kan lei then sak leh dawn a ni. India ramah Sawhthing tharchhuah a tam avangin a rate a chhia a, rate control kan duh avangin loneitute cho hmanhmawh lo turin kan chah,” a ti.

Mizoram Agriculture Marketing Board thu zawm lova cho vak vakte chu an mangang leh si tih sawiin Agriculture Minister chuan, “Chutih rualin sawrkar chuan Sawhthing neitute manganna a hria a, a sutkianna atan kan lei sak leh tan dawn. Hei hi kut hnathawktu, Sawhthing cho lawk tawh ho chhanchhuahna tur a ni,” a ti a, tuna sawrkar in Sawhthing a buaipui ang hi Mizoram-ah a la awm ngai loh thu a sawi a, tuna an buai chhan ber chu an vawi khatna a nih vang a nih tih sawiin, nakum lamah chuan a ziaawm a beisei tih a sawi bawk.

Sawhthing rate chhiat chhan zirchiangin South India lamahte an kal tih sawiin Minister chuan, “Mi ram hawhin an ching a, kumthar atan thlai dang an chin duh tawh avangin an cho vak vak a, man tlawm tak takin an hralh a ni. Thlai dang daih an chin tawh dawn avangin nakumah chuan kumin angin Sawhthing tharchhuah a tam tawh dawn lo,” tiin Sawhthing rate pawh a that chhoh an beisei thu a sawi bawk.