Raltlan leh luh leh chhuah khuahkhirh dawn

Lunglei District thuneitute chuan an District chhunga raltlante chu Relief Camp atanga an luh leh chhuah an khuahkhirh dawn.

    Ningani khan Lunglei District SP ho hian Thaizawl Relief Camp-ah Awareness Campaign for Myanmar Refugee buatsaih a ni a, he hunah hian Lunglei SP J. Lalmuankima leh a Staff te bakah Sub-Hqrs. YMA, MZP Hqrs. Lunglei leh MSU Regional Hqrs Lunglei te’n hun an hmang a. Lunglei SP Jerome Lalmuankima chuan Raltlan Camp-ah duty te dah an nih tur thu leh duty-te leh raltlan Camp Leader te remtihna lo chuan Camp atanga duh ang anga luh leh chhuah hi khuahkhirh a ni ang tih a sawi a. SP chuan raltlante chu Mizoram hmun hrang hrang a buaipui mek leh thalai tam tak suattu ruihhlo tawlhrutu ni lo tur leh a tilui an awm a nih chuan dan anga hrem an nih tur thu a sawi a. License nei lova lirthei khalh lo tur leh an khalh lui a nih chuan dan anga hmalak a nih tur thu sawiin, Kenbo 125 bike-te te chu mahni awmna Camp theuhah khawtlang hruaitute leh Police te nen tangkawpin, hmun khatah khalhchhuah theih loha dahkhawm turin hmalak a ni ang, a ti bawk. Thaizawl Refugee Camp-ah hian tun dinhmunah chhungkua 167 awmin, mi 746 an cheng mek a. Zirna In pawh Primary atanga Higher Secondary thleng a awm a ni.