Serchhip Kawnpui kum 70-na

Serchhip Kawnpui kum 70-na

- Laldinpuia

Serchhip khua hi tuna kan awmna ‘Serchhip Kawnpui’ a khaw hlui atanga insuanthlak hi a la rei lutuk lo a, tun hma chuan Serchhip Kawlri hmunah khian kan pi leh pute an awm thin a. Thuziak hlui atanga hmuh theiha a lan dan chuan Serchhip tih hming pu a khua mumal taka a din hi kum 1903 atang a ni a. Hei hi tunah chuan luah a ni tawh lo a, tuna Vengchung chhak lam khawhlui bawr vel khi a ni awm e. Amaherawhchu Serchhip khaw hlui atang khian tlem tlema tuna kan awmna lama kan tawlh thlak zel avangin tuna kan awmna ‘Serchhip Kawnpui’ tih nen hian sawi zawm a ni ta zel a, Serchhip Kawnpui pawh hi Serchhip tih hming hi a pu ta ber zawk a ni.

Serchhip (tuna khaw hlui nita) a awm lai hian tuna kan awmna Serchhip Kawnpui kan tih hi khua a la awm lova, motor kawng awmin hetah hian mi thenkhat te chu chakkhai lain an ramkal thin a (chutih lai chuan tuna kan awmna hi ramhnuai vek a la ni). Kum 1923-ah Serchhip ah Tirhkoh Suakchhawna a lo awm tan a. Kum 1934-1935 bawr velah Pastor Chhawna (Tirhkoh atanga Pastor a hlankai tak) chuan inlarna a hmu thin a, dai ah te hian a vak a vak thin a. Tumkhat chu khua atangin Kawnpui-ah (tuna kan awmna hmun hi motor kawng tur laih anih avangin Kawnpui tih a ni in) chhukin Rangva In auchhuah a tum thu a sawi a, khuaa mite chuan mak an ti hle a, kha tih hunlai kha chuan lamlian bak kha In ding leh mihring hnuhma hmuh tur engmah a la awm si lova, thenkhat chuan an Pastor chu a a tawh ni hialin an sawi nghe nghe a ni awm e. Tichuan Kawnpui-ah chuan a chhuk ta a, Kawnpui-ah chuan khua a la din tur thu te chu ramhnuaiah chuan a zuk tlangaupui a, Damdawi In awmna tur te, kawtthler awmna tur te zuk sawiin perh te a zuk phun ta a ni.

Tichuan hun a lokal zel a, Pastor Chhawna lo hmuh lawk ang chuan tuna kan awmna Serchhip Kawnpui lamah hian tlem tlemin kan insawn thla ta zel a. Serchhip VCP hmasa ber Pu Chalzinga chuan sawrkar ah ‘Kawnpui’ hmuna awm phalna dilin, khatih hunlaia Mizo District Council Executive Member Pu Lalbuaia chuan phalna a lo pe ta a ni.

Chutia sawrkar lam atanga phalna hmuh anih takah chuan Pu Darkhuma chuan Kawnpui hmunah (tuna Pu Lalngaihzuala In dinna hmunah hian) in a zuk sa a, December 22, 1955-ah a luah tan a. Hei hi Serchhip khawhlui atanga Serchhip Kawnpui lama kan insawn thlak bul tanna chu a ni ta a ni. Kum 2025 December ni 22 hi a kum 70-na (Platinum Jubilee) chiah a ni.