Sawrkar in Buhhum Quintal 1472.80 a lei tawh

Nikum December 19 hnu lamah Mizoram Sawrkar chuan Buhhum Quintal 1472.80 a lei tawh.

Supply Minister B. Lalchhanzova chuan Kolasib Pangbalkawn-a Mizoram sawrkar in Buhhum a leina hmun, Om Om Modern Rice Mill chu a tlawh a, he hunah hian Supply Minister chuan Mizoram sawrkar chuan State pawn atangin thla tin buhfai quintal thahnem tak a lakluh in thu sawiin, heng lakluhna atan hian sum tam tak State pawnah a kal chhuak thin tih a sawi a. “Heng zawng zawng te ngaihtuah in leh kan loneituten an buh tharchhuahte atanga hamthatna tha zawk an neih theih nan sawrkar chuan Paddy and Rice Procurement Committee dinin, Mizoram tharchhuah buh leikhawm chu nikum, December atang khan Kolasib Pangbalkawn-a Om Om Rice Mill atangin a kalpui tan ta a ni,” a ti.

December ni 19, 2024 atanga tun thlenga Sawrkar in Buhhum a lei tawh chu Quintal 1472.80 a nih thu Supply Minister chuan sawiin, hei hi Rs. 4,418,400 man niin, Sawrkarin a tum ber chu farmer ten incentive dawng tha se, sawrkar sum senso a tam deuh anih pawhin nakin zelah Mizo-ram in buh a kan intodelhna atana pawimawh tak a nih dawn avangin sawrkar chu a inhuam a ni, a ti bawk.

Mizoram Buh thar lei hi Bana Kaih Policy hnuaia Mizoram sawrkar in phai lam atanga buhfai an chawkluh thin tihtlemna tur leh loneitu ten an lo tangkaipui zawkna tura loneitute tharchhuah buhhum a leisakna a ni a. Kolasib leh Mamit District chu Pilot Project atana puangin heng buh te hi khaw hrang hrangah mimal emaw, FPO emaw FPC emaw Society dang kaltlangin an phurkhawm thei a, an phurhkhawmna rate erawh anmahni inbiakremna a ni anga, Sawrkar chuan kg ah Rs. 30 zelin a leisak thin a. Om Om Rice Mill hi kum 2017-ah din tanin March 17, 2022 khan hawn a ni.