Ruihhlo do kawnga YMA te hmalakna thlawp

Home Minister K. Sapdanga chuan nimin khan Aizawl-a YMA Zawlbuk tlawhin Central YMA hruaitute a kawm a, ruihhlo do kawnga YMA te hmalakna a thlawp tlat tih a sawi.

Home Minister hi Central YMA President Lalhmachhuana leh Central YMA Vice President leh Kumpuan Committee Chairman ni bawk Prof. Lalnuntluanga bakah Central YMA hruaitu dangten an lo dawngsawng a, YMA hruaitute tarlan danin, kumin March ni 15 atang khan Central Anti Drugs Squad (CADS) kalpui leh tan a nih hnuah nimin, March 31, 2025 thlengin Heroin No. 4 hawng 30 man tawh niin, Codeine bur 2000 chuang leh ruihhlo dang thahnem tak an man bakah ruihhlo kaihhnawih ah mi 80 chuang chu thuneitute kutah leh Home-ah dah an ni tawh tih an sawi a, hei bakah hian ruihhlo ti thin te siamtha turin Mizoram Synod nen Counselling an kalpui tih an sawi bawk.

Home Minister chuan ruihhlo leh sual dona kawngah thawhhona tha neih a tul thu leh tih tak zeta tha thlahlo a hmalak zel a tul thu a sawi a, YMA chu thawhpui ah sawmin, tlang hrang hranga YMA Branch hrang hrang te hmalakna chu a thlawp tlat tih a sawi bawk a ni.