Aizawl khawpui faina atan Sawrkar in ngaihtuahna nasa tak sengin hmalakna leh hmachhawp a nei

Aizawl khawpui faina turah Mizoram Sawrkar in ngaihtuahna nasa tak sengin hmalakna leh hmachhawp hrang hrang te a nei mek thu UD&PA Department changtu Minister K. Sapdanga chuan a sawi.

Central YMA, UD&PA leh AMC te tangkawp chuan kum 2025 – 26 chhung atan Aizawl khawpui faina kawnga chak zawka hmalak a nih theih nan thawhhona thuthlung siamin hemi bawhzuina atan hian nimin khan ‘Aizawl khawpui Faina Hnatlangpui’ neih a ni a, he hunah hian UD&PA Minister K. Sapdanga chuan Fai tur chuan fai duhna kan thinlungah kan put hmasak a ngaih thu sawiin, Aizawl khawpui faina turah Mizoram Sawrkar in ngaihtuahna nasa tak sengin hmalakna leh hmachhawp hrang hrang te a nei mek thu a sawi a. Aizawl khawpui faina leh thianghlimna atana pawimawh em em, hriselna atan pawh a nghawng thui tak nei thei tur damdawi In leh a kaihhnawih bawlhhlawh sawngbawlna changtlung tak ‘Common Biomedical Waste Treatment Facility’ Tuirial ami chu Aizawl Smart City Ltd. in a sak hna a zawh tawh thu leh April ni 1 atang hian a takin hna a thawh tan tur thu a sawi a bawk.

Minister K. Sapdanga chuan Aizawl Smart City Ltd. kaltlangin a bika siam danglam bawlhhlawh tawih thei phur motor 20 lei a nih thu sawi bawkin, heng motor te hi Aizawl Venglai leh Ramhlun South-ah te July leh August, 2024 khan hlawhtling taka enchhin a nih thu te, Lirthei 20 te hi AMC-ah hlan niin tangkai taka hman anih theih nan hmalak mek a nih thu a sawi a. Hei hian bawlhhlawh thliar kawngah leh bawlhhlawh tawih thei sawngbawlna ah hmasawnna a thlen ngei a beisei thu a sawi bawk.

Central YMA, Aizawl Municipal Corporation leh UD&PA Department te thawhhona hnuaia Aizawl khawpui Faina Hnatlangpui neih a nih rual hian ‘YMA Branch Fai Inelna 2025’ chu khuhhawn nghal a ni a, hei bakah hian Minister hian Central YMA hruaitute hnenah bawlhhlawh bawm lian 300 a hlan nghal bawk a ni.

Aizawl khawpui Faina Hnatlangpu hawnna hun hi Central YMA Vice President Prof. Lalnuntluanga chuan kaihruaiin Aizawl Deputy Mayor R. Thanglura pawhin thu a sawi bakah Central YMA President Lalhmachhuana pawhin thu a sawi a, YMA Branch te leh Local Council te kaihhruaina hnuaiah mahni huamchhungah theuh hnatlang hi neih a ni.