Corporation te enkawlna atan sum seng tam thin

Mizoram sawrkar hnuaia sumdawng tura din Corporation hrang hrangte enkawlna atan sawrkar chuan kumtin cheng vaibelchhe 21 leh nuai 52 chuang a seng thin.

Mizoram sawrkar hnuaiah hian Corporation hrang hrang awmin heng te enkawlna atan hian kumtin sum ruahman thin a ni a. Mizoram Khadi & Village Industries Board (MKVI Board) enkawlna tana kumtin-a Mizoram sawrkar sum sen chu Rs. 13,20,35,000 a ni a, Zoram Industrial Development Corporation Ltd. (ZIDCO) tan cheng nuai 401.78 sengin Mizoram Food & Allied Industries Corporation (MIFCO) tan cheng nuai 251.9 a sen a ni bawk a. Zoram Handloom and Handicrafts Development Corporation Limited (ZOHANDCO) tana kumtin a Mizoram sawrkarin sum a sen chu cheng nuai 164.47 a ni a. Mizoram Agriculture Marketing Corporation Limited (MAMCO) tan kumtinin cheng nuai 14.47 a seng bawk a ni.

MKVI Board hnuaiah hian hnathawk mi 126 an awm a, ZIDCO hnuaiah thawktu mi 32 awmin MIFCO-ah 25, MAMCO-ah 17 leh ZOHANDCO-ah mi 15 an thawk bawk a. Sawrkar tana pawisa thawkchhuak tur an nih laiin Mizoram sawrkar hnuaia Corporation-te hian an hnuaia thawkte hlawh tur atan pawh sawrkar sum (share capital) a pek ziah a ngai tih Akashvani Aizawl chuan a tarlang a. Sum thawhchhuah chu sawi loh kumtina sum tam tham tak an hloh reng avangin kum 2008 khan an chungchang zirchiang tur hian sawrkar chuan Deloitte and Touche Consulting India chu a ruai a. Deloitte hian rawtna siamin MAMCO, ZENICS leh ZOHANDCO te chu thiat turin a ti a. MIFCO chu mimal kuta hlan (privatise) a ZIDCO chu thuamthat (revamp) turin a rawt bawk. Hei hi kalpui mek a nih laiin sawrkar lo ding thar chuan a ngai a kalpui zuiin ZENICS tih loh chu sum tam tak hloh chungin sawrkar chuan a la kaltir ta reng niin a tarlang bawk

Hetihlai hian ZIDCO bik hi a kal zelna turah tuna ZPM kaihhruai sawrkar hian hmachhawp hrang hrang a nei niin Official-te chuan an sawi a. Chief Executive Officer/Managing Director chu Mizoram sawrkar hnuaia Officer ten an kawp thin a, Sawrkar chuan Management lama mithiam State Bank of India-a DGM thawk lai chu Deputation-in a la chhuak a, ani hian ZIDCO-a MD hna hi nikum March ni 11 khan a zawm a. Hei bakah hian ZIDCO chu mahni a inchawm a kal thei turin sawrkar chuan tuaithar a tum a, Development Banking anga hma la tura tih a ni a. Hmasawnna ruhrel din kawnga nasa taka kal a, sawrkar laipui leh Mizoram sawrkar hnuaia hnathawktu Project Implementing/ Construction Agency ni a, Project Work te khawih theia siam tum a nih thu Official-te chuan an sawi a ni.