RD Department hmalakna thlirletna hun hmang

Rural Development Department hnuaia scheme hrang hrang kalpuite thlirletnahun, Rreview Meeting chu nimin khan Aizawl-a Assembly Annexe Conference Hall-ah neih a ni a, he hun hi RD Department changtu Minister Prof,. Lalnilawma chuan a hmanpui a ni.

He Review Meeting-ah hian Rural Development Department changtu Minister Prof. Lalnilawma chuan Rural Development chu mipuite nena inngheng hnai ber pawl an nih avangin Department pawimawh tak a ni tih a sawi a. Officer kalkhawmte chu an hnathawhna hmun theuh ah mipuite nena inlaichinna tha leh Bialtu MLA te leh Minister-te nen a inhriatthiam tawnna nena hna thawk thin tura chahin, Ram leh hnam hmasawnnna turah chuan huaisen taka kal thin turin a fuih a. Sawrkar chuan Department hrang hrangte thawhhona (convergence) chu a ngaipawimawh hle tih sawiin, chumi lamah chuan Officer-te pawh a theih ang anga thawkho tlang zel thei tura ngaihtuahna seng thin turin a sawm nghal bawk a ni.

He Review Meeting hi RD Department changtu Addl. Secretary V. Lalengmawia chuan kaihruaiin kalkhawmte lo lawmna thu a sawi a. RD Schemes hrang hrang: SAGY/DISHA-te, PMAY-G leh BADP/VVP II-te, PMKSY-WDC leh MGNREGA chungchangte presentation ngaihthlakho a ni a. Hemi zawh hian District hrang hranga DRDO Project Director leh BDO-te hnen atanga presentation ngaihthlak chhunzawm niin, hei hi scheme kalpui zel dan tur sawihonain a zui a. RD Department-a Under Secretary Denny Lalchhuanawma chuan lawmthu sawiin Meeting hi a tihtawp a ni.

Review Meeting-ah hian District hrang hranga DRDO Project Director leh BDO-te bakah Rural Development Department hotute leh mi pawimawh dangte an tel kim hle a ni.