A tak taka thawh an duh thu Minister in a sawi

Tourism Minister Lalnghinglova Hmar chuan hun rei tak chhung Mizoram-ah Tourism potential a awm thu sawi a lo ni tawh thin tih sawiin, “Tunah chuan theihna a awm thu sawi ringawt lovin, potential haichhuak turin a tak taka thawh kan duh,” a ti.

Tourism Minister Lalnghinglova Hmar hian nimin khan Union Minister for Tourism Gajendra Singh Shekhawat chu New Delhi-a a chenna In-ah kawmin Mizoram tourism hmasawnna tura hmalak mekna bakah hmathlir a neihte a sawipui a, he hunah hian Mizoram Tourism Minister chuan Mizoram in tourism ah ‘potential’ sang tak a neih thu leh a bikin Eco-tourism leh Adventure tourism-ah te India hmunpui ni tur khawpin theihna a awm thu Union Minister a hrilh a. “Hun rei tak chhung Mizoram-ah Tourism potential a awm thu sawi a lo ni tawh thin. Tunah chuan theihna a awm thu sawi ringawt lovin, potential haichhuak turin a tak taka thawh kan duh,” a ti a. Mizoram Tourism hmasawnna tura a hmathlir tihhlawhtlin kawngah Central sawrkar leh a bik takin Union Tourism Minister puihna a la mamawh dawn chauh tih a sawi bawk. Hei bakah hian kum 2024 ah tourist nuai nga chuangin Mizoram an tlawh thu pawh Tourism Minister chuan sawiin, chu chu Official State population atangin 50% deuhthaw a nih thu a hrilh a. Tun atanga hun reilote ah Sairang thleng Rel a luh tawh dawn avangin tourism hmasawnna kawng a inhawng zau sawt tih a sawi bawk.

He inkawmna ah hian Union Tourism Minister Gajendra Singh Shekhawat chuan Mizo-ram-a tourism hmasawnna’n theihtawp a chhuah pui tur thu Tourism Minister chu a lo hrilh a. Tourist tam zawk hip thei tur chuan hmunhma neih that piah lamah State sawrkar leh mipuite inbuatsaih a, rilru sukthlek thlenga inhawn a tul thu a sawi a. Project lian tham leh rotling zel siam thin a tul thu leh, Private Investor-te thawhpui uar turin Mizoram Tourism Minister chu a lo râwn bawk a; sawrkar laipuiin Tourism Sector-ah SASCI atangin sum thahnem zawk dah a tum thu leh an ngaihtuah mek thu a sawi bawk.

Sports Minister ni bawk Lalnghinglova Hmar hian nimin vek khan Railway Sports Promotion Board (RSPB)-a Secretary Prem Chand Lochab leh a thawhpuite chu New Delhi-a Rail Bhawan-ah kawmin Mizoram sawrkar leh RSPB te thawhdun theihna hrang hrang an sawi bawk a. Tun atanga reilote ah Sairang thleng Rel a lut dawn tih sawiin, Indian Railways tan Sports leh thil dangah Mizorama hmalakna tur kawng a inhawng zau sawt dawn a. Mizoram hmasawnna turah Indian Railways nena thawkdun turin sawrkar chu a inhawng reng tih Sports Minister chuan RSPB Secretary hi a hrilh a, RSPB hnuaia Mizo infiammite an luh theih dan tur an sawiho bakah Mizoram-ah ngei sawi chhunzawm turin an rawt bawk.