Ram thenawm buaina avangin Mizoram-ah dan lova lut ruihhlo leh kuhva ro a hluar hle niin sawi

Mizoram Police-a DGP Anil Shukla chuan ram thenawm Myanmar leh Manipur buaina avangin Mizoram-ah dan lova lut ruihhlo leh kuhva ro a hluar hle tih sawiin, hemi tihtawp tumin Mizoram Police ten theihtawp an chhuah thin tih a sawi.

Mizoram Police Department huaihawt Police Conference 2025 chu nimin khan Police Conference Multipurpose Hall, PHQ, Khatla-ah neih a ni a, he hunah hian Director General of Police (DGP) Anil Shukla chuan Mizoram chu venhimna kawng ah ram ralmuang tak anih avangin harsatna lian tham thleng a awmlo tih a sawi a, ram thenawm buaina avangin ruihhlo leh dan phal loh thil chi hrang hrang thleng a awm avangin venhimna kenkawh kawngah uluk zual a ngaih thu a sawi a, Mizoram Police ten dan lova lo lut tihtawp kawngah theihtawp an chhuah tih a sawi a ni. DGP chuan tunlai thiamna in a ken tel Social Media chu uluk zawka zirchian a kuhahkhirh a tul thu a sawi a, Smart City hnuaia CCTV hmun engmaw zat ah dah anih tawh thu leh tangkai zawka hman a tul thu te a sawi a. State leh ramdang nena inrinna hmunah te CCTV dah a nih thu sawiin, heng te hi ruihhlo, kuhva leh dan phal loh chi hrang hrang ramchhunga lut thin tihtawp nana tangkai tur a nih thu a sawi bawk. 

DGP Anil Shukla chuan Criminal Law dan thar pathum chu nikum July ni 1 atang khan ramchhung hmun dang rualin Mizoram-ah pawh hman ve nghal a ni tih sawiin, Case hrang hrang ziahluh tawh niin tun dinhmunah Criminal Law dan thar pathum hnuaiah thubuai 1500 chuang ziahluh tawh a nih thu a sawi a, Mizoram hmun kilkhawr Internet that lohna ah a nihna ang tura Criminal Law thar pathum te chu hman a harsat thu sawiin, hengah hian hmasawnna tur hrang hrang ngaihtuah a ni dawn tih a sawi bawk.

DGP chuan Mizoram Police Conference an buatsaihin a tum ber chu Police te intuaitharna leh mawhphurhna inhrilhtharna hun a ni tih pawh sawiin, Criminal Law dan thar an hman tak hnuah a kenkawh dan tur leh dan hnuaia hmalak dan tur hrang hrang inzirtir a nih tur thu a sawi bawk a. Mizorama dan kenkawh dan tur hrang hrang leh hmasawnna tur hrang hrang inzirtir a ni dawn bakah dan lova Mizorama thil chi hrang hrang lakluh kawnga hmalak dan tur leh ruihhlo do chungchang bakah khawtlang him zawk a awm theihna tur chungchang te pawh sawiho a ni ang.