April 1-ah sawrkar in vbc. 1093 a nei niin sawi

Chief Minister Lalduhoma chuan nikum April ni 1-a sawrkar in pawisa a neih chu cheng vbc. 520 niin kumin April ni 1-ah chuan cheng vbc. 1093 a nih thu a sawi.

Nimin-a Aizawl Vanapa Hall a thu a sawina ah Chief Minister Lalduhoma chuan ZPM sawrkar chuan tan a lak thu leh an inren nasat zia sawiin, Department zawng zawng pawhin theihtawp an chhuah thu leh sawrkar hnathawk ho hlawh pawh a hun taka an inpek theih thin thu te a sawi a. April ni 1 hnuah Department tinin bill an thehluh theih chauh thin avangin April thla-ah erawh thla dang angin hlawh pek a rang thei lo tih a sawi a. Tunah pawisa a awm thu leh Department inpeih hmasa apiang hlawh an inpek hmasak tur thu sawiin, inpeih har deuh chu an pe tlai deuh dawn tih a sawi a ni.

Chief Minister chuan, ZPM sawrkar chhungin an MLA te zingah Corruption avanga hminghliau an la awm miah lo chu Pathian hruaina a nih thu sawiin, “Kan Officialte zingah pawh chutiang chu kan la nei miah lo a, hei hi kalphung thar chu a ni. Mimal nunah Pathian ram lo thleng zel sela, chhungkua leh khawtlangah nen, chuti chuan kan ram hian hmasawnna tak tak kan dai chho zel dawn a ni. Development hi a pawimawh em em rualin Moral Reform hi kan Sawrkar hian kan ngaipawimawh hle a ni,” a ti bawk.