NH-154 kawngpui laihzauh hna thawktute dang

Bairabi Land Owners Association te chuan NH-154 kawngpui laihzauh hna thawktu NIDHI Construction te hnathawh mek chu nimin zing atang khan hnathawk thei lovin an dang.

He kawngpui, NH-154 hi Hailakandi District, Assam atanga lo chho in Bairabi - Bilkhawthlir ah a chhuak a, a siam hna hi kum 2006-2007 atanga bul tan tawh a niin he kawngpui in a paltlanga ram neitute hi zangnadawmna pek tura tihfel ni tawh mahse, tun thlenga la pek loh mi thahnem tak an la awm a ni. Kum 2024-a he kawng siam hna Mizoram sawrkarin a chhunzawm leh dawn khan ram neitute hian Kolasib DC hnenah an harsatna tawh thlen in, zangnadawmna pek an la nih loh dante an hrilh a. DC chuan enfiah nawn turin kum 2024 kumtir khan ruahmanna a siam angin Revenue Department aiawh, PWD (NH Division-III) aiawh leh Bairabi SDO (Civil) aiawh te chuan an enfiah nawn leh a, hemi tum hian ram neitu mi 34 te chu Compensation pek tura ruahman a ni.

Contractor NIDHI Construction chuan hna an thawk chho zel a, tunah hian hna hi za a sawm riat (80%) chuang zet an thawkzo tawh a. Heti chung hian tun thlengin kawngpui in a paltlang chhunga ram neitu mi 34 te hi zangnadawmna pek an la ni lo a. Thil nih dan hriatpuitu Kolasib DC hian theihtawp a chhuahpui chung pawhin tun thlengin Mizoram sawrkar thuneitute hnen atangin innghahna tlak thu chiang hriat tur an la nei lo tih Bairabi Land Owners Association te chuan thuchhuah siamin an sawi a. Kawngpui siam hna hi an thawh zawh hma ngeiin zangnadawmna hi pe turin thuneitute an ngen nawn leh tih sawiin, Sawrkar atangin thuchiang leh rintlak an hriat hma chuan Contractor hnathawk tur hi dan nise ti a an rel angin nimin atang khan hanthawktute hi an Camp kawt-ah an dang ta a ni.