Kumin ah ruihhlo vbc. 195.48 hu vel zet man tawh

Kumin January leh March thla inkar, thla thum chhung khan Excise & Narcotics Department-a thawkte chuan ruihhlo cheng vbc. 195.48 hu zet an man tawh.

END thupuangtu Peter Zohmingthanga’n a sawi danin hemi hun chhung hian Crystal Meth kg 48 leh gram 61 manin Methamphetamine kg 44 leh gram 111 an man bakah Heroin kg 15 leh gram 192 zet an man tawh bawk a. Tualchhunga an hralhna man ang chuan Crystal Meth hi kg khat cheng vbc. khat hu ni a hriat a ni a, Methamphetamine hi kg. ah cheng nuai 13 hu a ngaih a ni bawk a, Heroin gram khat hi Rs. 3,000 chuanga zawrh leh hralh a ni a. An hralhna erawh hi chu a hmang duh an tam leh tam lohah leh Myanmar atanga lo lut a tam leh tam lovah thui tak a innghat niin an sawi. Heng bakah hian ganja kg 84.913 bakah thalaite’n an hman sual nasat damdawi - Alprazolam, Nitrazepam leh Tramadol bakah codeine telna khuh damdawi thahnem tak man a ni bawk.

Hetihlai hian thla thum chhung hian ruihhlo hmansual vangin Mizoram-ah mi 14 an thi leh tawh a, an zinga 2 hi hmeichhia an ni. Excise & Narcotics Department-in an chhinchhiah danin kum 1984-a Heroin ngai pakhat a thih atanga kumin March thla tawp thlengin ruihhlo vangin mi 1,893 an thi tawh a, an zinga 230 te chu hmeichhia an ni.