MSPMC ten Hospital Complex sak mek an enfiah

Mizoram State Project Monitoring Committee (MSPMC) chuan nimin khan Saitual District Hospital Complex sakna hmunhma enfiahin hawzawl District Hospital pawh an enfiah bawk.

Mizoram State Project Monitoring Committee (MSPMC) hian an Vice Chairman, R. Lal Rinawma hovin khum 50 awm thei tura ruahman Saitual District Hospital Complex sakna hmunhma hi an enfiah a, Saitual District Hospital Complex-ah hian quarter pathum- Type-III Quarters (3 units, 1 block), Type-IV Quarters (2 units, 1 block) leh Type-V Quarters (1 unit, 1 block) sak mek a ni a. Main Hospital Building hi Joint VC leh sawrkar department te atanga a hmun lai rem hmasa tura ngenna a awm avangin hnathawh lai hi thla 10 chuang chu khaihlak tawhin, hna kal lai hi chawlhsan rih a ni. He hunah hian 50 bedded District Hospital Complex Saitual-a sak tur chungchanga Contract Agreement anga a hun taka sak a nih theih loh chhan te sawiho niin, harsatna sutkian dan tur te ngaihtuahho a ni bawk.

Mizoram State Project Monitoring Committee (MSPMC) hian Khawzawl District Hospital fangin an endik bawk a, Khawzawl DC K. Vanlalthiana, Addl. DC Lalfakzuala leh Medical Superintendent Dr. Albert Lalhminghlua te'n lo dawngsawngin Quarters sak lai leh Hospital building sak belh mek an endiknaah an telpui bawk. Khawzawl PWD thawktute leh District Hospital thawktute nen inkawmna hun hmangin project kal dan te, mamawh an neih te, harsatna an tawh te leh an zawh theih hun tur te an sawi ho a ni.

MSPMC Vice Chairman R. Lal Rinawma chuan project tluang takin a kal a ni tih an hmuhin lawmawm a tih thu a sawi a, engineer te leh In sakna lama hnathawk te fakin an building sak a that mai bakah an hmanraw hman te pawh a tha tih a sawi bawk a ni. Khawzawl District Hospital sak belh mek Quarters leh building thar hi sak zawh tawh chin (physical achievement) hi 42% a ni a, nakum November 2026 vela zawh tum a ni.