Chief Minister in FOCUS 2.0 kalpui tur sawipui

Chief Minister Lalduhoma chuan nimin khan IFAD Design Team te chu a Pisa-ah kawmin Mizoram-a FOCUS 2.0 kalpui dan tur an ruahmanna te a enpui.

He inkawmna ah hian Chief Minister chuan FOCUS 2.0 atana an thil ruahman ah belh deuh hlek tula a ngaih te a hrilh a, Scheme dang nena kalkawptir (convergence) a that a rin thu pawh a hrilh a. Hmalakna inbawhthuah (duplicacy) a awm loh nana Department dangte nena inhre tawna kal (coordinated) a pawimawh thu leh thil thar chinchhuah (innovation) lama hmalak uar a thaa a hriat thu a sawi bawk a. Piyush Kanal, Country Programme Analyst, IFAD & ICO chuan kum 2019 atanga bul tana kum 2024-a tawp ta, FOCUS-a Mizoram District 6-a khaw 272 a cheng chhungkaw 55,000 te tana hma an lak dan tlangpui a tarlang hmasa a. An hmalakna zarah chhungkaw 41,888 te chuan sik leh sa inthlak tuar thei eizawnna (climate resilent practice) an thlang zui ta nia an hriat thu a sawi.

A thawhhnihna an kalpui tur FOCUS 2.0 an ruahmanna tlangpui chu he hunah hian Alessandra Cage, Mission Director & Agri Business Expert chuan a sawifiah a. Mizoram District 11-a RD Block 26 huama khaw 700 huapa kalpui an tum dan a tarlang a. A Project Component pawimawh tak chu Market Access & Entreprenuership leh tharchhuah tihpun leh climate inthlak zel tuar thei chi thlai uar a ni a. Mizoram sawrkarin Zau Policy a kalpui tur nena kal tlang thei tura ngaih a ni. Hei bakah hian FOCUS 2.0 hi Bana Kaih nena inhne rual taka kalpui theih a nih thu a tarlang bawk.

Nimin vek khan Planning & Programme Inplementation Department Committee Room-ah Mizorama District hrang hranga 11-a RD Block 26 huamchhunga FOCUS 2.0 kalpui tur chungchang sawihoin sawrkar mi pawimawh te an thukhawm bawk a. he thutkhawm ah hian FOCUS 2.0 kalpui dan tur an ruahmanna enfiah niin FOCUS 2.0 tum ber chu kuthnathawktute dinhmun chawisan a nih thu tarlan niin FOCUS 2.0 hman tangkai dan tur hrang hrang sawiho ah ZPM Policy zinga mi pakhat, ZAU Policy kalpui theih dan tur chungchang ngaihtuah a ni a. He ZAU Policy tum ber chu Mizoram chhunga kuthnathawka eizawng te hnathawh tih chak leh loneitute dinhmun chawisan a ni.

He hunah hian thingtlang lama hnathawk tur lakbelh a tul thu leh FOCUS 2.0 hnuaia hamthatna leh hlawkna hrang hrang Mizoram in a dawn theih nana a hmanrua leh bungraw neih ang te, thawhpui hrang hrang te leh mithiam neih te a tam thei ang ber leh tangkai thei ang bera hman a that thu te pawh he hunah hian sawi a ni a, FOCUS 2.0 leh ZPM Policy te chu tha tak leh inrem takin Mizoram-a kuthnathawka eizawnna tih hmasawn nan a kalkawp thei dawn tih he hunah hian tarlan a ni bawk.