112 Emergency Response Support System betu tam

Rikrum thila phone hmanga biakpawh theih, 112 Emergency Response Support System (ERSS) ah kumin January ni 1 atanga April ni 7 thleng khan Call 12788 leh SMS 3824 dawn a ni tawh. 112 ERRS hi chhiatna hrang hrang kangmei, Medical lam leh Accident hrang hrang a thlena engtik lai pawha call theih a ni a, 112 Emergency Response Centre, Aizawl SP Office in a chhinchhiah danin, kumin chhunga case an dawn zingah pawisa kaihhnawiha inbum tumna vanga buaina a tam hle a, thuneitute chuan hemi laka fimkhur turin mipuite an ngen a ni. 112 Emergency Response Centre-ah hian Telephone 11 awmin ni khat-ah darkar 24 chhung duty an awm a, Police, Fire leh Ambulance motor te hemi atan hian inring rengin a awm a ni.