Motor hmangin Tui sem tum

Lunglei khawpui-a Tui harsatna chuan ziaawm lam ala pan thei lo a, hei vang hian PHE Minister Prof. Lalnilawma leh Lunglei-a MLA pali te ruahman angin Vawiin atang hian Lunglei khawpui chhung Veng hrang hrangah lirthei hmanga Tui sem tum a ni. Hemi atan hian Lunglei Truck Owners Association te nen thawkho in Truck 10 vel chu Tui semna atan hian ruahman a ni a, Zobawk leh Hnahthial inkar Mat Lui-a Tui chu chawi tur a ni ang. Hemi rual hian Tui semna hmun tur leh a sem hun tur ruahman nghal a ni a, tun thla ni 18 thleng atan ruahmanna hi siam phawt niin a tul anga chhunzawm zel tur a ni ang.