Aizawl Dinthar in kawng zawh

Thla hmasa lawka Heroin hawng 440 man kaihhnawih-a an veng mi Henry Lalbiakzinga Chhundeng man a nih kalzelah Aizawl Dinthar Local Council leh All NGO huaihawtin khawtlang in kawngzawh an nei a, he kawngzawh hi Dinthar kawn atanga tanin Henry Lalbiakzinga Chhundeng chenna In kawt-ah Local Council, YMA, JAC, MUP leh MHIP-te buatsaih Resolution pathum an pass hnuah buaina chhuak awm lovin an tin a ni. He huna Resoultion an pass-ah hian ram leh hnam hmelma, nunna suattu Heroine hawng 440, Henry Lalbiakzinga Chhundeng man sak a ni chu lawmawm an tih thu leh a phu tawh hremna pe ngei tura thuneitute an phut thu te, ruihhlo tawlhrukna liantham ah an veng mi a lo inhnamhnawih chu pawi an tih thu leh an Veng-ah ruihhlo leh a zuartute tan hmun a awm loh thu te a tel a ni.

Hetianga kawngzawh neih a nih hma, nizan hmasa khan thalai engemaw zat chu Henry Lalbiakzinga Chhundeng te In kawt-ah hian an pungkhawm leh a, he huna pungkhawm te hian In neitute pangpar khawina hmangin an lirthei Car, Bike leh Scooter te an suasam sak a, In ah erawh an lut lo. Hemi hnu nimin zing dar 3:00 vel khan Henry-a chenpui mi 7 te chuan an chenna In hi a chhuahsan a, tun dinhmunah an In-ah hian tumah an awm rih lo nia thudawn a ni.