Mizoram State Central Library-ah inziaklut tam

Mizoram State Central Library in a chhinchhiah danin nikum April atanga kumin March thla thleng khan Mizoram State Central Library-ah mi 548 an in ziaklut a, MSCL a inziaklut zawng mi 10,113 an awm tawh a ni.

Mizoram State Central Library hnuaiah hian kum kalta chhung khan lehkhabu 4899 hawhchhuah a ni a, hriat theih chinah MSCL tlawhtu hi kum kalta chhung khan mi 7083 an awm a, heng zinga a tam zawk chu Competitive exam inbuatsaih te niin, zirlai Research Scholar an awm bakah naupang an awm bawk a. Kumin February thla chhung khan MSCL tlawhtu zat chu 391 niin heng zingah hian naupang 12 puitling 369 an awm a ni.

MSCL hotute sawi danin tunlai hian tlawhtu thahnemin nitin mi 150 in MSCL hi an tlawh thin niin an sawi a. Tun dinhmunah MSCL hnuaiah hian lehkha hawhtheih hi General 49,089, Hindi lehkhabu 17,425 leh naupang lehkhabu 5924 a awm a, lehkhabu hawh theih zat 72,431 a awm mek niin an sawi. MSCL hian lehkhabu hi tlawmngai pawl hrang hrang hnenah a semchuak thin a, February thla khan lehkhabu 20,480 sem chhuakin a vaiin lehkhabu 128,219 an semchhuak tawh a ni.