FOCUS 2.0 Design Mission Kick-Off hun hmang

Mizoram-a FOCUS kalpui chu a tawp tak avangin ‘FOCUS 2.0’ chu kalpui a ni leh dawn a, nimin khan FOCUS 2.0 Design Mission Kick-Off hun chu Aijal Club-ah hman niin he hun hi Agriculture Minister PC. Vanlalruata chuan a hmanpui a, Mizoram-ah Agriculture-in hma a sawn theihnan chuan 'Farm connectivity' a pawimawh hmasa tih a sawi bawk.

Aijal Club-a Agriculture & Farmers' Welfare Department buatsaih, FOCUS 2.0 Design Mission Kick-Off hun Agriculture & Farmers' Welfare Department Special Secretary Ramdinliani chuan kaihruaiin IFAD (International Fund for Agricultural Development) atanga Design Mission member telte lawmna thu a sawi a, Agriculture Minister PC. Vanlalruata chuan Design Mission-te hnenah a ngaihpawimawh hrang hrangte sawiin, loneitute'n kalkawng tha an neih theihna tura hmalakpui ah a sawm a, sawrkar chuan Zau Policy a kalpui mek a tih sawiin, FOCUS 2.0-ah pawh hian Zau Policy zulzuiin Cluster-based approach anga hmalak ni thei se a tih thu a sawi a ni.

FOCUS Design Mission team-te hi April ni 18 thleng Mizoram-ah cham tur a beisei an ni a, an cham chhung hian District hrang hrang a zin kualin, sawrkar mi pawimawhte an kawm dawn a ni.