India ram inpawh leh nghet kan siam thei tih sawi

Mizoram Governor General (Dr) Vijay Kumar Singh chuan Hnam ziarang leh nunphungte kan inhriatpawhtawn hian India ram inpawh leh nghet kan siam thei tih a sawi.

Governor hian nimin khan a chenna Raj Bhavan Durbar Hall-ah 'Ek Bharat Shreshtha Bharat' hmalakna hnuaiah Bihar, Rajasthan leh Odisha-te State puitlinga hlankai ni, 'Foundation Day' lawmna hun a buatsaih a, he hunah hian Larsap chuan Ek Bharat Shreshtha Bharat hmalakna chuan India rama hnam ziarang hrang hrangte a chawimawi bakah zahawmna a vawnhim sak tih sawiin, “He hmalakna hiam khua leh tuite inkarah inpawhtawnna leh inhriatthiamtawnna tih chak deuh deuh a tum a ni,” a ti a. India ram ang ram zau leh hnam ziarang hrang hrang awmna ah inpumkhatna vawnnun tlat a pawimawh thu sawiin, “State hrang hrang atanga kalkhawmin kan hnam ziarang leh tihdan phungte kan phochhuak hian 'Ek Bharat Shreshtha Bharat' thil tumte a takin a lantir a ni,” a ti bawk.

Larsap chuan India rama State tin te'n history hranpa theuh kan nei tih sawiin, State hrang hrangte awmze nei taka remkhawm a nih theih nana hmalatu langsar tak Sardar Patel chu fakawm a tih thu leh hriatreng a nih tawh tur thu a sawi a. India hmarchhak chu hnam ziarang leh nundan phung hausa tak nei a ni tih sawiin, State dang atanga lokalte hmarchhak State-a an awm chhung ngeia an culture-te hi zira hriatchian lehzual tum turin a chah a, “Hnam ziarang leh nunphungte kan inhriatpawhtawn hian India ram inpawh leh nghet kan siam thei a, hetiang programme buatsaih hi ram chak zawk leh inpumkhat siam nana pawimawh tak a ni,” a ti bawk.

March ni 22, 1912 khan Bengal Presidency atangin Bihar a lo piang a. Chanchin ropui tak tak neiin hmanlai zirna hmun pawimawh Nalanda University bakah Bodh Gaya leh hmun pawimawh tak tak awmna State a ni. Rajasthan hi March ni 30, 1949 khan Jodhpur, Jaipur, Bikaner leh Jaisalmer lal ramte inzawmkhawm chuan siamin Greater Rajasthan tia vuah a ni a. History ropui tak tak neiin Pink City Jaipur leh khawpui pawimawh tak takte awmna State a ni. Odisha hi tunhma chuan Bihar hnuaiah awmin, April ni 1, 1936 khan State puitlinga hlankai a ni a, tawng hman behchhana India rama State piang hmasa ber a ni. Kalinga lal ram awmna leh Temple 600 chuang awmna niin, Temple State ti a vuah a ni.

Ek Bharat Shreshtha Bharat programme hian India rama State leh UT hrang hranga cheng hnam hrang hrang, hnam ziarang leh nunphung inang lo tak takte inkara inpawhna tha zawk siam leh an inkara inhriatthiam tawnna nasa zawk siam a tum a. He programme kaltlang hian India State leh UT hrang hrangte dinchamphaphak lawmna chu Raj Bhavan-ah Governor kaihhruaiin June, 2023 atang khan buatsaih tan a ni.