Mizo hnam zia phochhuak thei kutchhuak neih zel duh

Chief Minister Lalduhoma’n Mizo lemziak thiamte kutchhuak a hmuh atangin an theihna san zia a hmuh thu leh Mizo hnam zia phochhuak thei kutchhuak mawi nei zel tura a duh thu a sawi.

Nimin khan Aizawl-a Lianchhiari Run Mini Theatre-ah UNESCO World Art Day, 2025 leh lemziak phochhuah hawngin Chief Minister chuan Mizo Folk Art tha taka phochhuah a ni chu Mizoram leh hnam chawimawina a nih thu leh khualzin hip nan pawha tha tak a nih thu a sawi a. Lemziak leh hnam nihphung (culture) chu thil inzawm tlat a nih thu sawiin, hnam tin chanchin hlui hriatna hnar chu an lemziak a nih zel thu a sawi a. Art leh Culture inzawm tlat chu UNESCO chuan thiam takin hmanrua ah a hmang tih sawiin, hnam nihphung hrang hrang te humhimin hmanlai lemziak leh kawng chi hrang hranga Art phochhuah te, milim ker te, lam te thlengin a humhalh tih a sawi. UNESCO chuan hmun humhalh bik, ‘World Heritage Site’ puangin thil hlui vawnhimna hmun hrang hrangte nasa takin a kalpui tih Chief Minister chuan sawiin, World Art Day pawh kum 2019-ah UNESCO in pawmpuiin UNESCO World Art Day tia sawi a lo nih tak thu a sawi a. Mizoten hnamdangte hriat an hlawhna langsar ber chu ‘Art’ ah a nih thu sawiin, Mizote lemziak, zai, lam, incheina leh hnam ze ropui tak tak te chuan Mizoram a chawimawi hle a ni, a ti bawk.

World Art Day lawmnaah hian lemziak leh art hrang hrang pho-chhuahna, Exhibition buatsaih a ni a, I&PR Minister Dr. Vanlalthlana leh Art & Culture Minister C. Lalsawivunga te pawhin an hmanpui a ni.