Dan lova lak CSS-a thawk te dahngheh theih an ni lo

Mizoram sawrkar hnuaia CSS hnathawkten anmahni dah-nghehna tur Dan a taka kalpui an phut avanga an nawrh chungchangah Chief Secretary mawhphurhna la mektu H. Lalengmawia chuan, thawktu tam zawk chu dan lo-a lak an nih avangin dahngheh theih an ni lo niin a sawi.

All Mizoram CSS Employees Coordition Committee (AMCECC) te chuan nimin, April ni 15 atang khan tun thla ni 17 thleng awh turin hnathawk loa nawrh an huaihawt a, hemi chungchangah hian nimin khan Chief Secretary mawhphurhna la mektu, Commmissioner & Secretary, H. Lalengmawia chuan CS Conference Hall-ah thuthar lakhawmtute kawmin, Centrally Sponsored Scheme (CSS) hnuaia thawk tam tak chu dan lo anga lak niin a sawi a, hei hi anmahni thiamloh vang reng erawh a ni lo tih sawiin, Advertisement awm lo leh DPC kaltlanga lak an nih loh bakah, Recruitment mumal taka Open-Competition-a lak ni lo an ni tih a sawi a, hetianga lakte hi dan anga dahngheh theih an ni lo tih sawiin, sawrkar tharin CSS thawktute dahnghehna tur Scheme a siam pawh dan anga lak te hman theih tur a nih thu a sawi a ni.

H. Lalengmawia chuan, CSS hnuaia thawkten Sawrkar an nawrh khum chu sut leh vat turin an duh tih sawiin, boruak a sosang zel a nih chuan sawrkar chuan No pay, No work' bakah an Service tihtawp sak thleng pawha hmalak a ni lo ang tih sawi theih a ni lo tih a sawi a, Department hrang hrangah hnathawk lo a nuarte hming kimchang GAD hnenah pe vek tura hriattir an nih bakah ni thum (3) chhung enthlakzui an nih tur thu a sawi a, boruak azirin sawrkarin a tul angin hma a la chho zel dawn tih a sawi bawk.

Hetihlai hian AMCECC chuan, Mizoram sawrkar hnuaia CSS hnathawkte ngheh theihna tur dan, Govt. of Mizoram regularization of CSS Employees Scheme, 2024, nikum June ni 18-a siam tawh chu a taka a hlawhtlin an beisei laia nikum October ni 21-a DP&AR Office Memorandum chhuaka checklist in a dal leh tak avangin sawrkar an nawr a ngai ta tih an sawi a. “AMCECC member dan lova lak kan awm kan hre lova, sawrkar Appointment Order mumal tak nei veka lak kan ni, dan dik loa lak kan awm a nih chuan dan loa min latu chu sawrkarin chhui chhuakin, a mawhphurtute chungah na taka hmala turin kan phut a ni,” an ti a. AMCECC ten Sawrkar lakah lungawilohna Pen/Tool Down Strike an neih mekah CSS member ten an thlawp tha chu lawmawm an tih thu pawh sawiin, “Kan thil phut point pathum te ngiata nawrhna Pen/Tool down Strike hian awmzia a neih loh chuan Dt. 21-23 April, 2025 chhung hian AMCECC chuan Mass Casual Leave lain nawrhna hi kan chhunzawm ang,” an ti bawk.