Ram neitu lungawi lo te Kolasib DC in a kawm

Bairabi Land Owners Association ten NH 154 Bairabi leh a chhehvel thawmthat hna thawh meka hnathawktute an dan chungchang ah nimin khan Kolasib District Bawrhsap hovin Land Owners Association hruaitute chu an thukhawm.

He thutkhawm Kolasib DC Conference Hall-a neih ah hian Kolasib DC chuan Land Owners te manganna chu an hriatpui thu leh theihtawp in a tul ang angin hmalak mek a ni tih a sawi a. He an lungawilohna bultanna kum 2006-a compensation dawng ve lo ten an dawn theih nan hian hmalakna thui tak kalpui a nih tawh thu sawiin, Spot Verification pawh nikum-ah neih tawh niin, chuta an assessment report te pawh PWD (Highway) lamah thawn a ni tawh tih a sawi a, chumi hnuah State sawrkar atanga thudawn bawhzuiin Re-assessment pawh neih leh niin chu chu LR&S Department-ah thawn a ni leh tawh bawk tih a sawi a. State sawrkarin a approval na PWD (Highway) lamah thawnin PWD lam pawh in an estimate te Regional Officer, MoRTH, Guwahati-ah thawnin an thu ngaihchan mek a ni tih a sawi a. Hetiang hi thil kal dan a nih avangin Contractor te hnathawk lo a an siam chuan awmzia a nei dawn lova, chuvang chuan dawhthei taka RO Guwahati lam thutlukna te ngaichang a contractor ten hna an chhunzawm theih nana an nawrhna te titawp turin a ngen a ni.

National Highway 154 (42km to 58km) Bairabi huamchhung a kawng thawmthatna tur atana Land Acquisition hna hi kum 2006 khan kalpui a ni a. Hemi atana compensation dawng tur list DC Kolasib in draft a siam te hi kum 2007 khan pawmpui a ni a. Amaherawhchu ram neitu, he Award No. 1 Draft a tel ve lo te hian sawrkar-ah lungawilohna thlen in sawrkar pawhin a bawhzui nghal a. Hemi chungchanga thutkhawmna te neih a nih hnuin nikum khan Joint Verification leh Assessment te neih a ni a. He Assesment-ah hian ram neitu 34 te lungawilohna chu thu tling ah pawm niin, Compensation an lak theihna atan a tul anga bawhzui nghal a ni a. State sawrkar leh Mizoram PWD (Highway) pawhin Ministry of Road Transport-in a zawhna an neih ang ang te chhangin an thutlukna leh Estimate te Regional Officer, MoRTH-ah an thawn tawh a ni.