Khawtlang Hruaitute Intawhkhawm Runpui nei

Khawzawl DC Office hmalakna in nimin khan Khawzawl Zaingen YMA Hall-ah Khaw-zawl District-a Village Council (VC) hruaitute leh YMA Branch hruaitute tan ‘Khawzawl District Khawtlang Hruaitute Intawhkhawm Runpui’ neih a ni.

He Intawhkhawm Runpui hi Addl. DC Lalfakzuala chuan kaihruaiin Deputy Govt. Chief Whip leh Tuichang bialtu MLA W. Chhuanawma chuan khuallian niin a hmanpui a, DC Office hmalakna a hetiang hun buatsaih a ni chu tha a tih thu leh Dan hriat a pawimawh thu sawiin, lehkha chhiar tam a tangkai thu a sawi a, khawtlang hruaitu kalkhawmte chu he huna an thil zir leh thil hriat thar te vawng thaa mipui tana hmang tangkai turin a chah bawk.

He hunah hian Sawrkar Department hrang hrang hnuaia hmalakna te, hamthatna awm te, hnathawh kal mek te leh khawtlang hruaitute hriat tul hrang hrang kim taka sawi chhuah a ni a. ‘Khawzawl District Chanchin’ tih lehkhabu chu khuallian hian a tlangzarh bakah VC tin hnena sem a nih bakah DC Office siam ‘Khawzawl District Information-cum-Grievance Redressal System, 2025’ tih booklet sem tel nghal niin Office hrang hranga thawkte leh anmahni biak-pawh theihna tur tarlan a ni bawk.