Tang mi 1386 awm theihna turah mi 1703 tang mek

Mizoram District hrang hranga Prisons Department enkawl Jail-te te chu Jail tang mi 1386 awm theihna tur a nih laiin tun dinhmunah mi 1703 an awm mek.

Nimin khan Home Department changtu Minister K. Sapdanga hovin Directorate of Prisons Conference Hall-ah Central Jail leh District Jail Superintendent-te nen Department hmalakna thlirletna hun hman niin he thu hi tarlan a ni a. He huna tarlan a nih danin September ni 15, 1986 khan Central Jail, Aizawl chu kalpui tan niin tunah hian Central Women’s Jail leh District Jail, Aizawl bakah Lunglei, Siaha, Champhai, Kolasib, Lawngtlai, Serchhip leh Mamit District Jail-te awmin Saitual, Khawzawl, Hnahthial District bakah Vairengte leh Tlabung-ah Sub-Jail kalpui tur a hmalak mek a ni a. Mizoram District hrang hranga Prisons Department enkawl Jail-te hi Jail tang mi 1386 awm theihna tur a nih laiin tun dinhmunah mi 1703 an awm mek thu tarlan a ni a. Awm tur bituk zat aia tam mi 549 awmin bituk zat aia tam awmna Jail-te chu Central Jail, Aizawl, Central Women’s Jail, Aizawl, Aizawl District Jail, Lunglei District Jail leh Champhai District Jail-te a ni.

Hei bakah hian Central Jail leh District Jail thawmthatna tur ruahmanna engemaw zat peihfel tawh a nih thu he hunah hian tarlan niin Jail tangte hun tangkai zawk a hman a nih theih nan an thiamna tihpunna tur ‘Skill Development Training’ buatsaih thin a ni a. Ar leh Vawk vulh, Carpentry Workshop, Computer Training, Agriculture Farming, Weaving/Handloom/Tailoring leh Handicraft training kalpui tthin a ni bawk.

He thlirletna hun hmanpuitu Home Minister K. Sapdanga chuan Jail chu misual, awm tha duh lo hremna hmun a kan ngaih thin kha tunah chuan insiamtha tura inkaihhruaina leh eizawnna tlak thiamthil inzirtirna hmun pawimawh tak a siam nih chhoh mek thu sawiin, khawtlang ralmuang leh nuam siam tur hian Jail enkawltute inpekna ah thui tak a innghah thu a sawi a. Prisons Department-a thawktute hnathawh hrang hrangte chu langsar viau lo mahse an mi enkawlte nun ah danglamna nasa tak thlen theitu an ni tih hre reng turin thawktute a chah a. Jail chu nunkawng dik leh tha inzirtirna hmun pawimawh tak a nih angin Jail tangte thunun tur chuan a enkawltuten mahni invawn leh inthunun theihna an neih hmasak a tul thu a sawi bawk.

He hunah hian Home Department changtu Secretary Vanlalmawia chuan inlawmna thu sawiin Prisons Department-a thawktute chu dan bawhchhiate hremna tipuitling tura Criminal Justice System-a thawktu pawimawh tak an ni tih hrechiang turin a chah a. Inspector General of Prisons R.Vanlalsawta chuan Prisons Department dinhmun leh hmachhawp te a tarlang bawk a ni.