ID pekchhuah chungchang ah fimkhurna tur sawiho

India khua leh tuite hnena pek thin nihna tihchianna (identity card) hrang hrang chu ramdang mi, a bikin thenawm ram Myanmar leh Bangladesh atanga chhan hrang hrang avanga lo lutte hnena pekchhuah a nih loh nana hmalak dan tur chu nimin khan Lunglei-ah sawiho a ni.

Lunglei Bawrhsap Navneet Mann hova sawihona hun DC Conference Hall-a neih ah hian Bawrhsap chuan ramdang atanga raltlan emaw, dan ang emaw, dan ang lo emaw-a lo lutte'n India khua leh tuite hnena pek thin ID Card hrang hrang neih an tum thin tih sawiin, chu chuan khua leh tuite chanvo leh hamthatna hmuh tur a tikiamin, a chhuhsak thin tih a sawi a, hemi veng tur hian khua leh tui ni lo te hnena ID Card pekchhuah a nih loh nan fimkhur a tul thu a sawi bawk.

He hunah hian ramdang mite hnena ID Card hrang hrang pekchhuah palh venna tura fimkhurna tur leh hmalak dan tur rawtna hrang hrang bakah, harsatna awm thinte tarlan leh sawiho a ni a. Certificate leh ID Card dilna atana finfiahna (proof) leh hriatpuina pekchhuah chungchang ah te, Certificate/ID Card lem hmang an lo awm pawha hmuchhuak vat thei tura endikna kawng ah te mahni zawn theuhvah fimkhur leh tanlak lehzual nise an ti a. Ram dang mite'n lirthei, ram, In leh bungraw dang an lei theih nana khua leh tuite zinga mahni hming leh nihna lo hawhtir a awm loh nan mipuite pawh fimkhur lehzual a tul thu te, hemi kawngah hian khua leh tui zawng zawngte tanho a tul thu te tar lan a ni bawk.

Lunglei District-ah hian raltlan awmte fel taka chhinchhiah niin DC Office atangin Temporary ID siamsak thin an ni a. Tun dinhmun (April 2025)-ah Lunglei District chhungah Myan-mar mi raltlan 1,971 leh Bangladesh mi raltlan 63 an awm mek a ni.