Education Minister leh NCERT hotute an inkawm

School Education Minister Dr. Vanlalthlana chuan nimin khan New Delhi-ah National Council of Educational Research and Training (NCERT) hotute a kawm.

Meeting pawimawh chhim tura New Delhi-a kal School Education Minister Dr. Vanlalthlana hian nimin khan Central Institute of Educational Technology (CIET) tlawhin, National Council of Educational Research and Training (NCERT) hotute nen an inkawm a, he hunah hian Minister chuan sawrkar thar a pian hnua an hna hmasa ber pakhat chu aikal chhawr tihtawp leh pisa kai hun chhung en thlithlai a nih thu sawiin, hemi atana hmanraw tha ber chu Technology a ni, a ti a. Mizoram sawrkarin Kai app a hman dante sawiin, VSK nen zirtirtute hman bik tura thlunzawm (integrate) tum mek a nih thu a sawi a. Mizoram hmasawn ngaihna tur ni a an hriatte chu a hnena thlen hreh lo tura chahin, School Education Department hnuaia thawktute nen theihtawp chhuaha bawhzui zel an inhuam thu a hrilh a ni.

He hunah hian NCERT-in zirna hmanrua pangngai piah lama zirtirna (alternative learning system) an kalpui dante, DIKSHA portal kaltlanga Digital Education Content siama dah chhuah a nih dante bakah zirlai leh zirtirtute tana Educational Technology hman tangkai a nih dante a hmun ngeiah en hova sawiho a ni bawk.

Hei bakah hian ram pum huapa Vidya Samiksha Kendra (VSK) kalpui a nih dan leh Mizorama hman a nih dante sawiho a ni bawk a. VSK hi technology leh data analytics hmanga school zirtirtute leh school dinhmun en thlithlaina niin, data hmanga thutlukna siamna tur leh zirna chungchanga sawrkar tha tihchakna tur leh langtlang sawrkar siamna tura hmanraw pawimawh tak a ni Education Minister hi a Private Secretary Dr. Albert Vanlalruata'n a tawiawm a ni.