Quarry Permit nei lova lung la an tam niin sawi

Mizoram Quarry Association chuan Mizoram-ah Quarry permit nei lova lung la leh her tam tak an awm thu an sawi.

Nimin-a Aizawl Press Club-a thuthar thehdarhtute an kawmnaah Mizoram Quarry Association chuan heng phalna nei loa quarry neite hian sawrkarah chhiah (Royalty) an chhun loh avangin sawrkar tan pawh channa nasa tak a nih thu an sawi a, sawrkarin Mining Check Gate a siamah danin a phut angin Form ‘O’ pek tur a nih laiin, anni hi chuan Form ‘O’ an neih loh avangin dan phal loh a sumdawng an ni tih mipuiin an hriat a pawimawh thu an sawi a. Hei bakah hian Mizoram pawn atangin company hrang hrang te’n hmasawnna hna hrang hrang an rawn thawhin an hnathawhna atan chauh lung lak phalna an neih thu leh an hna a an hman tur bak pawn lamah hralhchhuah phalna an nei lo tih an sawi a, Hetianga an hralhchhuah hian Mizoram sawrkarah chhiah an pek loh bakah dan kalh a nih thu sawiin, chung zingah chuan SLT Maubuang rama rawra her mekte an tel thu leh mi tin te dawr tawh lo tura an ngen thu an sawi a ni.

Rawra Rate chu sawrkarin a pawmpui dan chuan Cubic meter khat Rs. 2500 a ni a, sawrkar-a Chhiah chhunluh chu cubic khatah Rs. 88/- niin hemi a Rs.8/- hi DMF Fund atan chhunluh a nih tih an sawi bawk.

Mizoram Quarry Association President C.Ladinfela chuan Mizoram sawrkarin tunhnaiah lung halna thahnem tak an man thu leh an man thenkhatte chu Quarry nei si lung la lo, mahse permit nei tho atangin a nih thu a sawi a. Quarry neituten hian lung halna permit an neih chu thla khata sawrkarin lei zat tur a bituk an tla lo zawk thin tih sawiin, dan ang thlapa kalpui chhunzawm zel an duh tih a sawi bawk.