Hnamdang hnathawk turte tan ILP neih ngei a tul ti

Aizawl Mosque Committee leh Mizoram Muslim Welfare Society-a General Secretary Mohammad Mamon Majumdar chuan Mizoram a hnathawh tum emaw, hnathawka awm lai mek hnamdang te tan Inner Line Permit (ILP) chu neih ngei ngei a tul thu a sawi.

Nimin-a Aizawl West-II Joint YMA Field-a Muslim Sakhaw zuitute’n Ramzan thla a an chawnghei tawp ni an lawmna, Eid-Ul- Fitr hmanna-ah sawiin Md. Mamon Majumdar chuan an awmna hmun ang zela insiam-rem a tul thu leh ram dan an lo siam sa te chu zawm a pawimawh a, chu chu Quran-ah pawh ziak a nih thu a sawi a. Aizawl West Joint YMA Chairman leh Committee Member-te chungah khelmual hman an phalsak avanga lawmthu sawiin, Eid Ul-Fitr atana an mamawh anga Police te’n an buaipui chu lawmawm a tih thu a sawi.

Mohammad Mamon Majumdar chuan chuan kalkhawmte chu pathian tihna nena hun hmang chu thil pawimawh a nih thu hrilhin, an mamawh ang hnathawh tur an neih theihna chhan chu Mizo mipuite an nih avangin lawmthu a sawi a. Mizoram Muslim Welfare Society an thawh-puina ah leh an thlawpna avanga tun dinhmun thleng thei an nih thu a sawi bawk a ni.

Aizawl Mosque hi March Ni 5, 1966 khan a lo kang tawh a. Aizawl Mosque Committee President ni thin M. Bakhtar Uddin Majumdar kaihhruaina hnuaiah a sak hna hi thawh that leh a ni a. Nimin-a Eid-Ul-Fitr tawngtai rual hian Mizoram Muslim Welfare Society member 3,000 chuang an kalkhawm a. Hei bakah hian Pushpak Mosque-ah mi 500 chuang leh Sairang Mosque-ah mi 100 atanga 150 chuang an kal-khawm bawk a ni.