Khaw tin Tui pek ni mah se Tui-a harsatna nei tam

Public Health Engineering (PHE) Department Engineer-in-Chief H. Duhkima chuan Jal Jeevan Mission (JJM) hnuaiah Mizoram-a thingtlang khua zawng zawng tui connection pek ni tawh mah se khaw thenkhat tuia harsatna nei an awm leh tawh thu a sawi.

Akashvani palaiin a kawmna ah H. Duhkima chuan tui in tur pek kawnga sawrkar laipui hmalakna pawimawh Jal Jeeven Mission (JJM) hnuaiah Mizoram-a thingtlang khaw 728-ah tui connection pek vek an nih tawh thu leh khaw siper-a ngaih zawng zawng pawh khua anga chhiarin an telh vek thu a sawi a. JJM hnuaiah tui connection pechhuak vek tawh a an inngaih laiin a Mission tawp hnu kum khat em pawh la ni lo ah khaw 66 chuan tui hna tlem avangin tui laknaah harsatna an tawk leh tawh tih a sawi a ni.

PHE-a E-in-C chuan khawpui lamah pawh an chhinchhiah danin Mizorama khawpui 28-a khawpui 17, a zatve aia tam daih chu tui an dawn tur ang la dawng lo, tui khawpkham lo an la nih thu a sawi a. Khawpui bakah thingtlang hmun tam takah chuan an khua aia sanga an khamkhawp tui lakna tur tui hna a awm tawh loh avangin ruam atanga pump a ni tlangpui tawh niin a sawi a. Eng ang pawhin khawl tha leh hmanraw tha awm mah se tui hna ber a that loh chuan awmzia a awm loh thu a sawi.

Er. H. Duhkima chuan ramngaw tih chereu avangin Mizorama tui hnain a tuar nasa a, tui khamkhawp hmu thei lo khua an tam phah hle tih sawiin, ruahtui dawhthleng tha tak chu ramngaw a nih thu leh ramngaw tha tak siam a pawimawh thu a sawi a, Fur laia inchunga tui luanliam tir mai mai, tui dahkhawl ngaipawimawh lo an tam tih a sawi a. Thal a lo thlenin sawrkar an dem leh mai thin niin a sawi a. Nunna atana pawimawh tak tui dahkhawlna tur tuizem lei tul ti lo an tam chu pawi a tih thu a sawi bakah Tui dahkhawl uar zel turin mipuite a sawm a ni.