MUHCS hlawhtling taka kalpui a nih theih nan thawktu engemaw zat lakna tur kalpui mek

Health Minister Lalrinpuii chuan Mizoram mipui hriselna enkawlna changtlung zawk 'Mizoram Universal Health Care Scheme' hlawhtling taka kalpui nan Health Department thawmthat a pawimawh thu sawiin, thawktu engemaw zat lakna tur kalpui mek a nih thu a sawi bawk.

Nimin khan Aizawl-a Directorate of Hospital & Medical Education Conference Hall-ah District tina Chief Medical Officer, District Medical Superintendent leh Community Health Centre leh Primary Health Centre-a thawktute tan Mizoram Universal Health Care Scheme (MUHCS) chungchang zirhona hun buatsaih a ni a, he hun hi Health Minister Lalrinpuii chuan hmanpuiin kuthnathawktute leh khawsak harsate dinhmun chawikan leh an harsatna chhawk zangkhai chu Sawrkar ngaih pawimawh berte zing ami a nih thu sawiin, chumi kawngah chuan hmalakna hrang hrang kalpui a nih thu a sawi a. Mirethei zawkte chhawmdawlna mamawh pui ber pahnih chu chhiattawhna leh damloh nikhua a ni tih sawiin, chhiattawh chungchang ah thingtlang mipuite In lum ah Sawrkarin ruang a phurh thlen sak tawh hnuah damloh nikhua a sum sen phuhrukna -'Mizoram Universal Health Care Scheme' chu ruahman leh tlangzarh a nih tawh thu a sawi a ni.

Health Minister chuan khawtlang leh mipui hriselna kawnga mawhphurna pawimawh tak chelhtu Health Department-a thawktute chu an thiamna leh theihnate, dawhtheihna leh inpekna thuk tak nen khawtlang tana hmang chhuak zel tura fuihin, chhuanlam hrang hrang avanga PHC emaw, CHC emaw, District Hospital emaw atanga khawpui lian zawka damlo enkawl hna hlanchhawn a nih hmain an inentirna hmasaah thawktuten theihtawp chhuah a inenkawl hna an kalpui hmasak thin a pawimawh thu a sawi a. Hetianga hna kalpui a nih chuan Mizoram PHC-a khum 500 vel leh CHC-a khum 270 bawr velte chu tangkai zawk a hman a nih tur thu leh khawpui Hospital-a khum indaih lohna avanga harstana thleng thin chu nasa tak a chhawk zangkhai a nih tur thu a sawi.

Minister chuan 'Mizoram Universal Health Care Scheme' hlawhtling taka kalpui nan Health Department thawmthat a pawimawh thu tarlangin, Medical Doctor 8, Nurse 300, Dialysis Technician 10, Laboratory Technician 10, X-Ray Technician 15, Pharmacist 6, Public Relations Officer 4, Accounts Manager 3 leh Data Manager 15 lakna tur kalpui mek a nih thu a sawi bawk.