FOCUS 2.0 atan inbuatsaihna kalpui mek a ni

Mizoram-a Fostering Climate Resilient Upland Farming Systems in the North East (FOCUS) 2.0 kalpui tur atan inbuatsaihna kalpui mek niin nimin khan Lunglei leh Siaha District-ah hemi chungchang sawihona hi neih a ni.

International Fund for Agricultural Development (IFAD) tanpuina in Mizoram-a District pali- Mamit, Kolasib, Champhai leh Serchhip District-ah kum 2018-2019 atang khan kum 6 chhung atan FOCUS Project hi kalpui a lo ni tawh a, he Prokect hi kumin kumtir lam khan tawpin tunah hian Project thar, FOCUS 2.0 chu kalpui leh turin hawn a ni tawh a, tunah hian District hrang hrangah fehchhuahpui mek a ni.

Tuna project thar FOCUS 2.0 hnuaia hmalakna hi kum 6 chhung (2025-2026 atanga 2031-2032) atan Mizoram-a District zawng zawngah, Block 26-ah, khaw 700-a chhungkaw nuai khat leh mihring nuai 5 velin an chhawr theih tura kalpui tum a ni a. Budget-ah US dollar maktaduai 72.29 vel ruahman niin IFAD tum tur 63.3% a ni a, Mizoram sawrkar in he Project-a a tum ve tur chu 20% a nih bakah Scheme dang nena convergence atangin 11.7% leh beneficiary-te tum ve tur 5% ni tura ruahman a ni a. Mizoram sawrkar Agriculture & Farmers Welfare Department hnuaia Society for Climate Resilient Agriculture in Mizoram (SCRAM) chu Lead Implementing Agency tur a ni.

International Fund for Agricultural Development (IFAD) Team-te hi Mizoram District hrang hrangah kalchhuak mekin FOCUS 2.0 kalpui tur atana project thar duan tur chungchang ah Line Department te an kawm a, Lumglei-ah chuan nimin khan Addl. DC Rochuangkimi Khenglawt kaihhruaiin thutkhawm neih a ni a, IFAD Design Mission Team-a Project Technical Lead Ayurzana Puntsagdavaa chuan Mizoram FOCUS 2.0 kalpui dan tur ruahmanna tlangpui a tarlang a. Project Design Team 2 Leader, LRS&WC Joint Director Rosy Lalmuansangi Hmar chuan project design thar duang tura Field Visit buatsaih a nih thu leh Field Visit kalpui dan tur tlangpui a sawifiah a. FOCUS 2.0 hmalakna turah Lunglei District ODOP (One District One Product) thei - balhla - chinna leh Balhla atanga thil siam vawrh lar leh tihmasawn tura ruahmanna siam dan kawng zawn nise tih a ni a. Tuihna humhalh leh tihpun te, lei venhim leh sawngbawl te, thingtlang loneih thlakna tur ngaihtuah te, kut hnathawktute hmanrua leh bungraw mamawh hrang hrang ngaihtuah te, tuilianin phai leilet a tihbuai thin venna tur te, kut hna thawktute tharchhuah deh ralna tur ngaihtuah te chu project hnuaiah ngaih pawimawh nise an ti a ni.

Siaha-ah pawh Addl. DC Abraham Beirazi Khithie kaihhruaiin thutkhawm neih a ni a, ei leh bara intoldelhna a awm theih nana huapzo taka project kalpui tura ruahmanna neih dan tur te sawiho a ni bawk.