Larsap in Lawngtlai tlawhin District hotute a kawm bakah kangmei tuar te tanpuina a hlan

Mizoram Larsap General (Dr) Vijay Kumar Singh chuan nimin khan lehlangin Lawngtlai District a tlawh a, sawrkar hotute a kawm bakah Diltlang South-a kangmei tuar te tanpuina a hlan bawk.

Lawngtlai District tlawhtu Larsap hi Lawngtlai Helipad-ah District Bawrhsap Cheemala Siva Gopal Reddy, SP R. Lokeshwaran leh Official dangte'n lo dawngsawngin Lawngtlai DC Conference Hall-ah Lawngtlai District chhunga MLA, ADC hotute, Sawrkar hnathawk, VC leh NGO hruaitute a kawm nghal a. Mizoram District zinga theihna nasa tak nei Lawngtlai District tlawhna hun tha a nei chu lawmawm a tih thu sawiin, Numaligarh Refinery Limited (NRL) in Lawngtlai District chhunga zirna tihhmasawn nana CSR kaltlanga School 14 te Smart Board a pe chu lawmawm a tih thu sawiin, Smart Classroom nei tura ITI Ltd. leh Implementing partner Living Thoughts Organisation-te hmalakna fakawm a tih thu a sawi a. Smart Board hmang hian Zokhaw lama zirlaite'n hmundang ang thoin thiam thil zirna remchang an nei dawn a, zirna bulthum Primary leh Elementary Education-te kan ngaipawimawh a tul thu a sawi bawk.

Larsap chuan Lawngtlai District chhunga Power supply pek la ni lo khaw 13 te'n an neih thuai theih nana hmalak a tul thu sawiin, sawrkar Department, VC leh NGO te chu khawtlanga dawmkan ngaite ngaihvena puih tum turin a chah a. Ramri bulhnaia awmte zalen taka inkalpawhna Free Movement Regime (FMR) chu tunhma atanga lo neih tawh a nih thu sawiin, tunhnaiah thenawm rambuai avangin khua leh tuite him zawk nan leh dan lova ramri kana thil tih a awm loh nan inkaihhruaina thar siam a ni a, hei hian harsatna siam a tum lova, khua leh tuite tana tha tura ruahman zawk a ni, a ti a. Ramri kaltlanga ruihhlo tawlhruk a hluar chu veiawm a tih thu sawiin, Mizoram chu ram ralmuang leh nuam a nih zel theih nana tanrual a tul thu a sawi a. Sawrkar laipui scheme pawimawh hrang hrangte tarlangin, mipuite'n an chhawr tangkai theih nana tanlak a tul thu a sawi bawk.

Lawngtlai DC Conference Hall-a Sawrkar Department hotute, VC, NGO, zirtirtute leh zirlaite a kawmna ah hian District Bawrhsap Cheemala Siva Gopal Reddy chuan Lawngtlai District Administration, Security dinhmun, Project tlangpui, mamawh leh theihna neihte PowerPoint Presentation hmangin a sawifiah a ni.

Larsap hian tunhnaia Diltlang South khuaa kangmei tuarte chu DC Office Chamber-ah kawmin a tawrhpui takzet thu a hrilh a, PMAY hamthatna hmanga In an din leh ngei theih nana hma la turin Bawrhsap a chah a. Governor's Discretionary Grant kaltlangin kangmei in a tihchhiat In neitu chhungkaw 9 te hnenah Rs. 1,00,000/- leh Inluahtu chhungkaw 8 te hnenah Rs 5,000/- theuh a hlan bawk a ni.