Chief Minister leh Home Minister ten Aizawl Treasury Square-a ‘Aizawl Ven Buk’ an tlawh

Cheng vbc. 87.18 senga din Aizawl Treasury Square-a Aizawl Ven Buk (Integrated Command & Control Centre under Smart City) chu nimin zing khan Chief Minister Lalduhoma leh Home Minister K. Sapdanga te chuan a hmunah an tlawh.

Aizawl Ven Buk an tlawhna ah hian Chief Minister Lalduhoma chuan Aizawl hmunhma lun zual lai cover vek thei CCTV Network, Record fiah leh changkang tak kan nei ve tawh chu lawmawm a tih thu sawiin, a enkawlna lam hautak deuh mah se ram leh khawtlang venhimna kawngah a tangkai tih a sawi a. “Duhthusam ah chuan Aizawl chhung leh a chhehvel hnaivai, Disaster thlen palh theihna hmun te huam thei ila a tangkai zual ang. He hmun tangkai lehzuala kan hman theih nan thawhhona tha in neih a tul dawn niin ka hria a, he hmun hmang tangkai thei Department-te nen tha takin lo thawk tlang ula, kan tangkaipui lehzual thei ang,” tiin thawktute a chah a ni.

Home Minister K. Sapdanga pawhin he Control Room zarah hian misual, rukru leh dawt sawi ching thlengin an chhuichhuak thin tih sawiin, “Tunhnaia mi pakhatin, ‘Raltlan, silai keng ten kut min thlak,’ a tih pawh kha thil dik tak chu he hmun atanga chhuichhuah a ni,” a ti.

He hunah hian Aizawl Smart City-a CEO CC. Lalchhuangkima chuan an hnathawh dan tlangpui sawifiahin, Aizawl khawpui hmun thlan bik 76-ah CCTV 237 leh Pan Tilt Zoom 39 dah a ni a. An dahna hmun zawng zawng mipui hnenah an hrilh vek lo thung a. Hmun pawimawh lai chu an hmu thei deuh vek tawh a, hnai takah chiang takin mihring hmel hmai pawh an Zoom thei a. Hmun panga-ah phei chuan hmel hre hranga chhinchhiah thei (Facial Recognition) Camera dah an ni. Lirthei pawh an vah velna thlengin an hre thei a, an Automatic Number Plate Recognition system hmang hian lirthei bo case 600 vel lai an chingfel tawh a. Lirthei, traffic dan bawhchhia pawh an chhui zel thei a ni.

Hmun panga-ah TV lian (Variable Message Display) dah tawh niin, man chawia hman theih a ni a, dah belh an tum leh mek a ni a. Hmun 15-ah Free Wifi an pechhuak mek bawk. An khawl hman hi a that avangin India rama a tha ber pathum zingah Aizawl ICCC hi a tel a. An thil record te hi a tlangpuiin ni 30 vel an dah tha a, hmanna tur awm lova an ngaih chu an tibo ve leh mai a. Vawnthat ngai chi erawh chu an vawng tha thin. Toyota Company chuan an CSR atangin Aizawl Traffic Management tihchangtlunna tura hmanrua, CCTV lam chi an rawn thawh belh nual a, chung bungrua hmang chuan ICCC Network hi tihlen tum mek a ni bawk.

Aizawl Ven Buk (ICCC) hi April ni 1, 2023 khan Union Home Minister Amit Shah chuan a hawng a, cheng vbc. 87.18 senga din niin aenkawl nan thlatin cheng nuai 7.8 vel mamawh a ni a. Mipui, a hmang tangkai duh tan Rs. 100 chawia hman theih a ni thung.