Homeopathy zirbingna kalpui nasat tul ti

Mizoram Larsap General VK. Singh chuan Homeopathy zirbingna, zirchianna leh enchhinna kalpui nasat a tul thu a sawi.

Nimin khan World Homeopathy Day pualin Dawrpui Multipurpose Hall-ah hun hman niin he hun a hmanpuina ah hian Larsap General VK. Singh chuan Homeopathy chu mihring taksa enkawlna kawnga belhchian dawl leh rintlak ber pawl a nih thu a sawi a, natna benvawn enkawlna tura tha bik a nih avangin mi tam zawkin an zir theihna atana tun aia nasa zawka tanlak a tul thu a sawi bawk.

National Ayush Mission, Directorate of Ayush buatsaiha he hun hman hi Health and Family Welfare Department-a Commissioner & Secretary H. Lalengmawia chuan a kaihruai a, Health Minister Lalrinpuii chu khualzahawm niin Homeopathy Doctor-te chu damlo enkawlna kawnga thawhhlawk tak tak an nih thu a sawi a, Health & Family Welfare Department hnuaia intihsiakna-ah te pawh lawmman hial an lak thu a sawiin, Mizoram a ramhmul damdawi thahnem tak awmte chu zirchian a, tangkai zawka hman a nih theihna atan sawrkar pawhin tan a lak zel tur thu a sawi bawk a ni.