Tuikum lui-ah tui pump tur a tam tih PHE in an sawi

PHE Department chuan Serchhip mipuite tana tuilakna ah harsatna lian lutuk an tawk rih lo tih sawiin, Tuikum lui-ah tui pawh a tam tawk rih thu an sawi.
PHE Department-a SE (Rural) H. Lalsiamliana chuan nimin khan Serchhip rawn tlawhin PHE Department in Serchhip khawpui chawmna atana Tuikum lui an lakna hmun chu a tlawh nghal a, PHE Department-a thawktute chuan an hnathawh dan hrang hrangte lo hrilhin, Serchhip khawpui chawmna atana tui lakna, Tuikum lui-ah hian mipuite mamawh tawk tui a awm thu leh Electric khawl hmangin tluang taka pump in mipuite hnenah pawh semchhuah mek a nih thu an lo hrilh a ni.

PHE Department-a thawktute chuan Serchhip khawpui-a tui pekna system hi kum 2022 thleng daih tura duan a ni tih sawiin, hemi vang erawh hi chuan harsatna an tawh thu an sawi a. Tunah hian Pipe line te a hlui tawh avangin Electric khawl ni lo, Diesel khawl hmanga an pump chuan Pipe hian a tuar thin tih an sawi a. Nikhat a darkar 24 an pump-ah ni khat sem tawk zel an pump theih laiin electric khawl hmang chauha an pump theih tak avang leh khawl a chhiat loh nan chawlh ve zeuh zeuh te a tul bawk si avangin harsatna erawh an neih thu an sawi a. Pumping Line thar tunah hian bun mek a nih thu leh hei hi an zawhfel hunah chuan Diesel khawl hmanga tui pump-in harsatna thleng lo tura an beisei thu an sawi a ni.