Assam Rifles chhuahsan-a ram neitu mi 13 te chungah Chief Minister in lawmthu a sawi

Chief Minister Lalduhoma chuan Aizawl khawpui atanga Assam Rifles insawnchhuah chungchang ah sawrkar hmasate pawhin thui tak kawng an lo sial tawh tih sawiin, helai ram chhunga ram nei mi 13 in vantlang tan an ram an pe chu thinlung takin lawmthu a sawi bawk.

ZPM Party buatsaihin nimin khan Aizawl Vanapa Hall-ah Assam Rifles ram chhuahsan avanga Pathian hnena lawmthu sawina hun hman niin he hunah hian Chief Minister Lalduhoma chuan Aizawl khawpui atanga Assam Rifles chhuah theihna chhan chu nikum-a Mizoram State Day-a Zoram mipuite tawngtaina rah a ni tih sawiin, AR Lammual chu Mizote ta ni thei tura tawngtai rualna ah rawt a nih thu leh hemi hnu June 20-ah Union Home Minister Amit Shah hmuin hei hi AR ram chungchang an sawi dunna hmasa ber a ni a ti tih a sawi a. “AR insawnchhuah chungchangah hian Sawrkar hmasate pawhin thui tak kawng an lo sial tawh a, an hmalakna fakawm kan ti a, lawmthu kan sawi a ni. Hemi ram chhunga ram nei mi 13 in vantlang tan an ram an pe hi thinlung takin lawmthu kan sawi a. chutih rualin Court a Sawrkar khing mek 11 an awm a, he ram hi British hun laia AR ram atana pek daih tawh a ni a. Chuvangin helaia hmun neitute pawhin Pathian in helai hmun hi mipuite tan a pe a ni tih hriaa, heng Court a thukal mek te pawh hi hnuk kir thei se kan duh hle a ni,” a ti.

He ram hman dan tur ngaihtuah tur Committee an din tawh thu leh Party tin aiawhte pawh telin, he Committee hi thutawp reltu tur an nih thu Chief Minister chuan a sawi bawk a, Sawrkar lam chuan ruahmanna lo neih sa emaw, duhdan lo neih an tum loh thu sawiin, AR ram chhuahsan hman dan tur chu Mizoram kuta awm anih thu leh duh dan sawi duh te chuan Committee hnenah sawi tur a nih thu a sawi a, Committee hi an thut tep tawh thu a sawi bawk.

Revenue Minister B. Lalchhanzova chuan report pein, Mizoram-ah hian Assam Rifles te hi an awmna a rei tawh thu leh Batallion hrang hrang awmin awmhmun an in khuar nghet hle tawh tih a sawi a. “Kum 1952 Assam Gazzette-ah AR ram chhungah hian mi sawm in ram an nei a, anni bakah kum 2005 khan PHE pawhin Pass DLL113 of 2005 an lo nei bawk a ni. Kum 2002 khan Sawrkar chuan Assam Rifles ram hi rin tha lehin mi 54 zet ram nei an lo awm ta a, heng mimal ram neitute hi Show Cause Notice pek an nih hnuin an zinga mi 13 in an ram an surrender tawh a, mi 3 hi chin hriatloh niin mi 11 ten High Court-ah Sawrkar an khing mek bawk a, tuna Sawrkar in chinfel a mamawh chu mi 38 an ni,” a ti.