Mizoram-a Eng chhit man chawhrual Rs. 7.82 niin Sawrkar in subsidy vbc. 180 chuang a pe dawn

Mizoram Electricity Regulatory Commssion (MZERC) chuan sawrkar kumthar April 2025 atanga Eng chhit/hman man chu chawhrualin Unit khat Rs. 7.82 ni turin a bithliah a. Eng chhit man hi tihsan a nih loh avangin sawrkarin subsidy a tum tur chu cheng vbc. 180.80 a ni dawn.

P&E Department-in sawrkar kum 2025-26 chhunga Consumer te Eng pek nan Unit khat zelah Rs.11.28 mamawh tura an insawi laiin Commission-in ARR a bituk sak atanga chhutin an mamawh hi Unit khat zelah Rs.10.97 a ni a, Rs.10.97 hi subsidy tel lova chawhruala Unit khat zel man tur Full Cost Tariff (FCT) niin sawrkar-in subsidy a pek loh chuan FCT hi hman tur a ni a. Sawrkar-in subsidy a pek tur cheng vbc. 180.80 hi advance-in thla tin cheng vbc. 15.06 a pe tur a ni a, a pek loh chuan FCT hmangin bill siam tur a ni a, sawrkarin subsidy a pek hunah bill-ah siamrem leh tur a ni. Sawrkar-in subsidy a pek sak chuan tlawm zawkin mipui hnenah chawhrualin unit khat man Rs.7.82 vel zelin an pe thei dawn a. Sawrkar-in consumer te subsidy a pek sak tur hi a pumpuia chawhrualin unit khat-ah Rs.3.15 vel zel ang a ni.

P&E Department-in kum 2025-26 chhung atan ARR leh Tariff bithliah sak tura an dilna chungchang hi March 11, 2025 khan Mizoram State Advisory Committee Meeting-ah sawiho a ni a. Hei bakah Tariff Petition chhungchangah hian March 12, 2025 khan Aijal Club-ah Public Hearing neih a ni bawk a. P&E Department hian kum 2025-26 chhunga power supply enkawl nana Revenue sum mamawh (ARR) cheng vbc. 754.69 bituk sak turin Commission an dil a, hemi hmuchhuak turin sawrkar kum 2024-25 chhunga tariff hi ti sang lova sawrkar kum 2025-26 a hman chhunzawmin, sum mamawh hmuh phak lohna chu Mizoram sawrkarin subsidy cheng vbc. 199.77 emaw, Commission-in ARR a bituk sak atanga 26.47% emaw, heta a tlem zawk zawk hian a phuhruk sak dawn tih an sawi a, an dil ang chuan eng chhit man thar tur hi chawhrualin Unit khat man Rs. 11.28 ang vel tur a ni.

MZERC hian P&E Department sum mamawhna te a zirchian hnuin ARR atan cheng vbc. 686.66 a bituk sak a, hei hi kawlphetha hralhna atanga hmuhchuah tur niin Commission chhut danin Tariff kan hman lai mek hmanga Mizorama chhunga power hralhna atangin kum 2025-26 hian cheng vbc. 448.93 leh kawlphetha hman bang ram pawna hralhna atangin cheng vbc. 56.93 an hmuh theih beisei a ni a, hei hi avaiin cheng vbc. 505.86 a ni. Hei hian cheng vbc. 180.80 (i.e, 686.66 – 505.86=180.80)-in ARR a phuhru zo lo a. A phuhruk phak lohna hi sawrkarin subsidy cheng vbc. 180.80 pe-in a pek sak theih dawn avangin Tariff hman laia eng chhit man rate hrang hrang te hi tisang lovin kum 2025-26 atan hmang leh turin Commission-in thutlukna a siam a ni.

Sawrkar kumthar 2025-26 chhung hian Mizorama-a consumer te kawlphetha hman zat tur hi 574.28 MU ni turin chhut a ni a. Sawrkar kum 2024-25 tariff hmangin P&E Department-in kum thar hian Consumer te hnen atangin Revenue cheng vbc. 448.93 hmu thei turin beisei a ni a, a pumpuia chawhrualin kum thar FY 2025-26 chhunga Unit khat man tur chu Rs.7.82 a ni.

Sawrkar kum kalta 2024-25 aia kum thar 2025-26 chhunga consumer te kawlphe-tha hman zat a tam dawn avangin Tariff hi tihsan ni lo mahsela kum thara Revenue hmuh tur hi a hmaa beisei zat aiin cheng vbc. 11.52-in a tam a. Tariff Order thar hi ni 24.3.2025 khan siam a ni a, kawlphetha ni 1.4.2025 atanga hman man chhutna tur a ni.

Kum 2025-26 hian Mizoram pumah Consumer hi 3,24,698 awm tura chhut a ni. Domestic consumer 2,96,394 leh Commercial Consumer 15,913 awm turin chhut a ni.