Adviser to CM in hmanpui

Adviser to CM (Finance & Planning) TBC. Lalvenchhunga chuan Junior Engineer Service Association of Mizoram (JESAM) inkhawmpui vawi 7-na chu Zirtawpni khan a hmanpui.

JESAM Conference-ah hian Adviser to CM chuan a tawnhriat atangin JE-te dinhmun leh hnathawhte a hriatthiam pui thu a sawi a. A hmuna a tak taka hna thawktu an nih thu leh harsatna a lo awm changa dem hmasak an hlawh thin thu te thlenga a hriatpui thu a hrilh a. JE te chu inzir zel a, thil thar lo chhuak apiang lo hriat ve zel a that thu hrilhin, eirukna laka fihlim chu mimal taka a thil ngaih pawimawh ber pawl a nih thu leh chumi kawngah chuan sawrkar thawhpui tlat turin kalkhawm te chu a sawm a ni.

JESAM hi kum 2015-ah din niin an member-ah hian Junior Engineer, Diploma and Non-Diploma, B.E leh M.E te thlengin an awm a. Works Department hrang hrang PWD, P&E, PHE, Irrigation leh Department hrang hrangah awmin, Department dang neuh neuh tiam lovin hna luah theih 733 an nei a. thawk mek lai hi mi 520 an ni.