Remna leh muanna aia pawimawh a awm lo tih sawi

Chief Minister Lalduhoma chuan hmasawnna kawngah remna leh muanna aia pawimawh hmasa engmah a awm thei lo tih sawiin, “Mizoram in chak taka hma a sawn chhan chu remna leh muanna a neih tlat vang a ni,” a ti.

Inrinni khan Aizawl Vanapa Hall ah Bru Student Association (BSA), General Hqrs.. Aizawl buatsaih Bru kumthar Kut, Boisu chu hman niin he hun hi Chief Minister Lalduhoma chuan a hmanpui a, Chief Minister chuan Mizoram-ah hnam peng hrang hrang kan cheng ho tih sawiin, “Inngeih takin kan khawsa thin. Hetianga lungrual taka kan khawsa ho thin hian kan ram a timawi a, a tinuam a. Kum tam tak chhung chu India rama State ralmuang berah kan inchhal tawh a ni,” a ti a. India ramah mahni hnamzia leh tih dan thate chawinung turin zalenna kan nei tih sawiin, “Mahni hnam zia leh kalphung chawilar duh luat vanga hnamdangte tih dan va ngaih theih loh erawh chu thil dik a ni thei lo,” a ti a. “Hnam hlawm lian deuh te, hlawm te deuh te kan nih avangin awm dan chin tawk kan thiam tlan pawh a ngai. A lian zawk nih vanga a te zawk hnualsuat lutuk te, a te zawk nih vanga pangchan leh lutuk te hi a tha lo ve ve a ni. Midang ngai theih lohna lam chi reng reng hi a tha lova. Hnam anga inhnuaichhiahna te, Sakhua ang zawnga inbeihna te a awm thiang lo. Ralthuam leka inlakhran tumna lam phei chu a awm kan remti lo bur. Mizoram in chak taka hma a sawn chhan hi remna leh muanna kan neih tlat vang a ni. Hei hi tihchhiat kan phal lo,” a ti.

Mizoram mi kan nih chuan Mizoram thatna tur kan ngaihtuah ve reng thin tur a ni tih pawh Chief Minister chuan sawiin, “Mi tih tur thil tha sawi hi a harsa lutuk lova, midang thawhchhuah sa han sawiselsak pawh hi a awlsam khawp mai. Chutiang thu leh hla chu Social Media-ah hian a tam thin hle. Khua leh tui tha, ram hmangaihtu dik te chuan kan phak tawka ram tana kan tih ve theih te kan ngaihven reng tur a ni, tiin Bru Students Association hruaituten an hmuh apianga an sawi thin, hun rei tak atanga an lo beisei tawh Bru House cum Hostel chu Tanhril-ah an sa dawn tih a sawi a. Sum pawh a awm tawh thu leh reilote ah hna tan thuai an tum thu a sawi bawk a ni.

‘Boisu Kut’ hi Bru kumthar kut a ni a, kumin hi Bru Student Association te bul tuma an lawm tum lina niin BSA President Lalromawia Apeto leh Bru Welfare Union of India-a President Biakthuama Molshoy te pawhin thu an sawi a, hun rei tak an lo dil a, an lo beisei tawh thin, Bru House cum Bru Hostel Mizoram sawrkarin a sa dawn ta chu an lawm takzet tih an sawi a ni.

He hunah hian BSA Shillong Cultural Troupe leh BSA Aizawl Branch leh Bodo Students Union, MZU ten hnam lam an entir a, Aizawl-ah hian BSA a tel mi sang khat vel an awm niin an sawi a ni.