Academic Year thar atan Zirna In te hawng tan dawn

Mizoram sawrkar in ruahmanna a siam angin kum 2025-2026 Academic Session atan Vawiin hian zirna In hrang hrangte chu hawn tan a ni leh dawn ta.

Mizoram sawrkar chuan nikum December 4 khan hriattirna tichhuakin Academic Session 2025-2026 atana School Calendar hi a lo tarlang tawh a, heta tarlan a nih angin Primary School, Middle School, High School leh Higher Secondary School te chu Vawiin April 7, 2025 hian hawn tan a ni leh dawn ta a, nakum (2027) February thla tawp-ah Promotion Exam result te tichhuakin Session hi zawhfel chauh tur a ni dawn a ni.

School Academic Year thar atan hian zirna In tam tak te chuan Admission tihna hun hawng tawhin sawrkar School tam takah chuan Vawiin hian Admission hi tih theih a ni dawn a ni. Hetihlai hian Sawrkar in Samagra Shiksha kaltlanga zirlai naupangte hnena a thlawna Zirlaibu a sem tur chu pekchhuah fel thawkhat a ni tawh a, zirna In hrang hrang-a naupang zat tur hriat ala nih loh avangin nikum lama enrolment mil-a lehkhabu hi pekchhuah niin Admission tihfel a nih hnuah a la daihlohna te hi pekchhuah leh tura ruahmanna siam a ni.