Kum kalta ah Mizoram puma a thlawna thisen pek 93.71 niin Serchhip-ah 97.67 a tling phak

Sssociation for Voluntary Blood Donation (AVBD) chuan Financial Year 2024-25 chhungin Mizoram-ah a thlawna thisen pek zaa 93.71 a nih thu sawiin, Mizoram in target a siam zaa 92 chu khum a nih thu an sawi a, Serchhip District Hospital Blooid Bank-a thisen pek za zela 97.67 chu Voluntary Donation a ni.

Mizoram puma thisen pek dinhmun chhinchhiahtu, Blood Transfusion Service, Mizoram State AIDS Control Society (MSACS)-in an chhinchhiah danin, nikum April ni 1 atanga kumin March ni 31 thleng khan Mizoram-a Blood Centre 11-ah thisen Unit 34,752 pek a ni a, chung zinga Unit 32,566 chu pek bik nei loa a thlawna pek (Voluntary donation) niin, Voluntary Donation hi 93.71% a tling a. Kum 2024-25 chhung hian Blood Centre hrang hrangte'n Blood Donation Camp vawi 611 an buatsaih a, chungah chuan thisen Unit 22,602 pek a ni bawk.

District Hospital Serchhip Blood Bank bikah kum kalta (2024-2025) chhung khan thisen Unit 730 pek niin heng zinga Unit 713 te chu Voluntary Donation a ni a, thisen pek zawng zawng atanga za zela 97.67 chu Voluntary Donation niin hemi hun chhung hian Blood Donation Camp tum 37 neih a ni bawk a, heng Camp hrang hrangah hian thisen Unit 639 lak niin Unit 74 te chu mi tlawmngai ten mahni-a Blood Bank-ah kala thisen an pek a ni bawk.

Sawrkar kum liamta ah khan Mizoram-a Blood Bank hrang hrang zingah thisen dawng tam ber chu Civil Hospital Aizawl niin thisen Unit 16,174 an dawng a, Blood Bank hrang hrang zingah thisen pek atanga a thlawna pek dawng tam ber chu Civil Hospital, Lunglei niin thisen an dawn Unit 3140 zinga Unit 3136 chu Voluntary Donation a ni a, hei za zela chhutin 99.87 a tling a, Christian Hospital Serkawn in dawtin thisen Unit 971 an dawn zinga Unit 952 chu Voluntary Donation a ni a, za zela 98.04 a tling bawk. Synod Hospital Durtlang chuan thisen Unit 3143 dawngin heng zinga Unit 3071 chu Voluntary Donation a ni a, za zela 97.71 niin niin District Hospital Serchhip hian a dawt ve leh a ni.

Association for Blood Donation (AVBD) chuan sawrkar lama hotute leh Mizoram mipuite tanrualna avangin Voluntary Blood Donation-a target khûm theih a ni chu lawmawm an tih thu an sawi bawk a ni.