Autonomous District Council pathumte tan sawrkar laipuiin theihtawp a chhuah zel dawn tih sawi

Union Minister of State for Home Affairs, Nityanand Rai chuan nimin khan Siaha leh Chawngte te tlawhin District Council hotute nen an inkawm a, Autonomous District Council pathumte tan sawrkar laipuiin theihtawp a chhuah zel dawn tih a tarlang.

Niminpiah-a Mizoram rawn thleng Union Minister of State for Home Affairs, Nityanand Rai hian nimin khan Helicopter hmanga Siaha thlengin CEM Bungalow-ah Siaha District MLA te, MADC hotute, Mizoram sawrkar Official-te bakah NGO hrang hrang hruaitute nen an inkawm a, hemi hnu hian CEM Bungalow tual-ah amah lo lawmna hun hi hman zui niin Nityanand Rai chuan mipui aiawha a kawm tak ten harsatna hrang hrang a hnena an thlente chu sutkian a nih theih nan theihtawp chhuahpui a tum tih a sawi a. National Education Policy 2020 chungchang sawiin, pianpui tawng (mother tongue) a zirlaiten an zir theih chu NEP 2020 thil tum pawimawh tak pakhat a nih thu leh Hindi tawng chawisan tumna nilovin ram chhunga tawng chi hrang hrang awm te chawisan nana duan a ni tih a sawi a. Citizenship Amendment chungchang pawh sawiin, ramchhunga Sakhaw dang vuantute nekchepna a ni lo a, Ram thenawm leh ram danga Sakhuana avanga tihduhdah tuarte tan zalen taka an chen theih nan leh India ram chu Sakhaw hrang hrang vuantuten zalen taka an awm theih nana duan a ni a tibawk a ni.

Hemi hnu hian Helicopter hmanga Chawngte pan leh nghalin Lawngtlai DC Cheemala Siva Gopal Reddy IAS leh SP Lokeshwaran R IPS bakah CADC CEM Molin Kumar Chakma leh sawrkar mi pawimawh ten an lo dawngsawng a, Chakma Autonomous District Council (CADC) Hall-ah inkawmna neiin CADC dinhmun tlangpui, hmasawnna hnathawh hrang hrang leh harsatna an neihte bakah hmasawnna awm tura pawimawh kawng hrang hrangte ngaihthlak a ni a. He hunah hian Union Minister of State Nityanand Rai chuan harsatna hrang hrang a hnena an thlente chu sutkian a nih theih nan a theihtawp chhuahpui a tum thu a sawi a. A bik takin ziaka a dawnte chu sawrkar laipui hnenah a thlen tur thu a sawi. Union Minister for State chuan India ram chu 'Developed Nation' a siam turin Sawkar laipuiin theihtawp a chhuah tih tarlangin, a bik takin One Nation One Ration Card, New Education Policy 2020, inkalpawhna leh Hriselna (health) ah te 'Flagship Scheme' pawimawh tak tak duanchhuah leh kalpui mek a ni, a ti a. Autonomous District Council pathumte tan sawrkar laipuiin theihtawp a chhuah zel dawn tih sawiin, Myanmar leh Bangladesh nena ramri nei vek an nih bawk avangin ramri venhim kawngah pawh theihtawp a thawkho turin a chah a ni.

Union Minister of State for Home Affairs Nityanand Rai hi Bihar atangin MLA Devesh Kumar chuan rawn tawiawmin nimin vek khan Aizawl an pan leh nghal a ni.