Zu khapna Dan sawiho rih lo

Mizoram-a Zu khapna Dan hman mek chu siamthat tumin nimin-a Assembly Inkhawm ah sawiho tum ni mah se sawiho rih loh a ni.

    Nimin a Assembly thutkhawm ah hian ruahman lawk ang chuan 'The Mizoram Liquor (Prohibition) Amendment Bill, 2025' hi putluh tum a ni a, Assembly Speaker Lalbiakzama chuan nimin zing khan Party pathum atangin MLA te a Pisa-ah an len thu sawiin, 'The Mizoram Liquor (Prohibition) Amendment Bill, 2025' chu nizan hmasa ah semchhuah a nih thu a sawi a, “Hei hi Member-ten inzirna hun deuh, han inpuahchahna hun te awm deuh se kan va duh em tiin an rawn ngen. Awm pawh ka ti a, House Leader leh Parliamentary Affairs Minister pawh ka rawn a, anni chuan a tha a lawm an ti,” a ti a. Hei vang hian sawiho tura ruahman ni mah se nimin-ah hian sawiho a ni dawn ta lo tih a sawi a ni. Assembly Speaker sawi danin, 'The Mizoram Liquor (Prohibition) Amendment Bill, 2025' hi tun tum Session chhunga sawiho tho tur a ni ang.