ZPM Thalai ten ram siamthat a har an rin thu sawi

ZPM Thalaite chuan ACB Case nei MLA thlavang hauhva hum kan tum zel a nih chuan ram siamthat a har hle a an rin thu an sawi.

    Nimin a thuchhuah an siamah ZPM Thalaite chuan Assembly Budget Session neih mekah Lalmuanpuia Punte zawhna ‘Pu V. Zirsanga’n eng case te nge a neih?’ tih House Leader leh Chief Minister ni bawkin a chhannaah V. Zirsanga’n ACB case neih pakhatah C. Ngunlianchunga chu ‘main accused’ a nih thu a sawichhuak tih sawiin, MNF sawrkar hunlaia C. Ngunlian-chunga’n ACB Case neih a sawichhuah chungchangah Mizoram Congress Party mi leh sate’n duhlohna lantirna atana nimin-a Mizoram Assembly Session neihlai tibuai zawnga awmkhawm phallohna hmuna an inhawrkhawm chiam chu Dan zahlohna lian takah an nga tih an sawi a. “Mizoram Congress Party-in ACB Case nei MLA thlavang hauhva hum kan tum zel a nih chuan ram siamthat chu a har hlein kan ring a ni. Mizoram Congress mi leh sate’n Pu Ngunlianchunga thlavang an hauh duh tak tak a nih chuan Court-a ngaihtuah a nih hunah theih tawpa tan la turin kan duhsak,” an ti bawk.